काठमाडौं (हाम्रो खेलकुद) – नेपाली राष्ट्रिय टोलीका मिडफिल्डर रोहित चन्द इन्डोनेसियाको लिग च्याम्पियन क्लब पर्सिजा जाकार्तामा पुन: अनुबन्धित भएका छन् । यसअघि नयाँ सिजनको सुरुवातमा रोहितको माग पूरा गर्न नसकेको भन्दै क्लबले अर्का खेलाडी लिएपनि क्लबले उनलाई फिर्ता बोलाउने निर्णय लिएको हो ।
गत सिजन पर्सिजालाई इतिहासकै पहिलो लिग उपाधि दिलाउने क्रममा रोहित प्रतियोगिताकै सर्वोत्कृष्ट खेलाडी घोषित भएका थिए । पर्सिजाले नयाँ सिजनका लागि प्रशिक्षक परिवर्तन गरेसँगै रोहितलाई पनि नयाँ सम्झौता दिएको थिएन । इभान कोलेभले जिम्मेवारी सम्हालेपछि क्लबले ल्याएको उज्बेकिस्तानका मिडफिल्डर जाहोनगिर अब्दुमुमिनोभले अपेक्षित प्रदर्शन गर्न नसकेपछि क्लबले रोहितलाई बोलाउने निर्णय गरेको थियो ।
बिहिबार इन्डोनेसिया प्रस्थान गरेका रोहित शनिबार क्लबमा अनुबन्ध भएको क्लबले जनाएको छ । उनले एक वर्षको लागि सम्झौता गरेका छन् । उनले अब क्लबको कप प्रतियोगिता र एएफसी कपमा खेल्नेछन् । लिग सिजन भने अझै दुई महिनापछि सुरु हुनेछ ।
रोहितले सिजनको अन्त्यपछि नेपालमै रहेर केहि समय बिताउँदै आएका थिए । पर्सिजाको समर्थकमाझ निकै लोकप्रिय रहेका रोहितको बहिर्गमनले क्लब निकै आलोचित हुँदै आएको थियो । समर्थकहरुले रोहितलाई फिर्ता बोलाउन क्लबलाई सामाजिक संजालमार्फत दबाब पनि दिएका थिए ।
