दीपक न्यौपाने, बुटवल
विक्रम धिमालले दुई गोल गरेपछि भ्याली च्यासल युवा क्लबलाई पराजित गर्दै विभागीय टोली नेपाल पुलिस क्लब तिलोत्तोमा गोल्डकपको फाइनलमा प्रवेश गरेको छ । शनिबार बुटवलमा भएको खेलमा पुलिस ३-१ ले विजयी रहयो ।
पुलिसका लागि विक्रम धिमालले पहिलो हाफको १५ औं मिनेटमा गोल गरेका थिए । विक्रमले नै दोस्रो हाफको ५७ औं मिनेटमा गोल गरेपछि पुलिस बलियो स्थीतिमा पुग्यो । रवी पासवानले खेलको ८० औं मिनेटमा गोल गर्दै पुलिसको जित सुनिश्चित पारे । इन्ज्युरी समयमा च्यासलका लागि सन्तबहादुर गुरुङले सान्त्वना गोल फर्काए ।
खेलमा दुइ गोल गरेका नेपाल पुलिस क्लबका विक्रम धिमाल म्यान अफ द म्याच बने । उनले १० हजार रुपैयाँ प्राप्त गरे । पुलिसले सोमबार हुने फाइनलमा दाउफिन्स फुटबल क्लबको सामना गर्नेछ । दाउफिन्सले पहिलो सेमिफाइनलमा आयोजक रुपन्देही-११ लाई पराजित गरेको थियो ।
