काठमाडौं (हाम्रो खेलकुद) – पेरिस सेन्ट जर्मेन (पीएसजी) को घरेलु मैदानमा सानदार जित दर्ता गर्दै म्यानचेस्टर युनाइटेड यूईएफए च्याम्पियन्स लिगको क्वाटरफाइनलमा प्रवेश गरेको छ । पहिलो लेगमा २-० ले पराजित भएको युनाइटेड बुधबार ३-१ को जित दर्ता गर्दै अवे गोलको आधारमा अर्को चरणमा प्रवेश गरेको हो ।

मार्कस रासफर्डले खेलको दोस्रो हाफको इन्ज्युरी समयमा पाएको पेनाल्टीलाई गोलमा परिणत गरेपछि युनाइटेडको जित पक्का भएको थियो । डिओगो डालोटले प्रहार गरेको सट प्रेस्नेल किम्पेम्बेको हातमा लागेर फर्केपछि रेफ्रीले भिडियो असिस्टेन्ट रेफ्री (भीएआर) को साहारा लिँदै युनाइटेडलाई पेनाल्टी दिएका थिए ।

युनाइटेडले खेलको दोस्रो मिनेटमा नै गोल गर्दै जितको आशा जगाएको थियो । रोमेलु लुकाकुले थिलो केहररको गल्तीको फाइदा उठाउँदै युनाइटेडलाई अगाडी बढाए । १२ अौं मिनेटमा जुअान बर्नाटले किलियन एमबाप्पेको पासलाई सदुपयोग गर्दै खेल बराबरीमा ल्याए । तर लुकाकुले ३० अौं मिनेटमा अर्को गोल थपे । रासफर्डले लामो दुरीबाट गरेको प्रहारलाई गोलरक्षक जियानलुइजी बुफोनले फुस्काएपछि लुकाकुले त्यसमा गोल गरे ।

च्याम्पियन्स लिगको इतिहासमा घरेलु लेगमा भएको पहिलो लेगमा २-० वा सोभन्दा पछाडी परेर अर्को चरण पुगेको यो पहिलो अवसर हो । रासफर्डले युनाइटेडका लागि प्रतिसपर्धात्मक खेलमा पहिलो पेनाल्टी लिँदै युनाइटेडको जितमा नायक बने ।