एजेन्सी – स्टार फरवार्ड क्रिस्टियानो रोनाल्डो बिना नै इटालियन क्लब युभेन्टसले सिरी ए अन्तर्गत शुक्रबार उडीनेजेलाई ४-१ ले पराजित गरेको छ ।

युभेन्टसको जितमा टिनएज खेलाडी मोइस किनले दुई गोल गरे । खेलको ११ औं मिनेटमा एलेक्स स्यान्ड्रोको क्रसलाई गोलमा परिणत गर्दै किनले युभेलाई अग्रता दिलाएका थिए । ३९ औं मिनेटमा उनले एकल प्रयासमा गोल गर्दै युभेको अग्रता दोब्बर पारे । पहिलो हाफमा पूर्ण दवाव कायम गरेको साविक विजेता युभेले दोस्रो हाफमा पनि त्यसलाई निरन्तरता दियो ।

किनले नै ६६ औं मिनेटमा युभेन्टसको लागि पेनाल्टी प्राप्त गरे । इक्त पेनाल्टीलाई एमरे च्यानले गोलमा परिणत गर्दै जिततर्फ लम्काए । ब्लेस माटुइडीले ७१ औं मिनेटमा हेडरमार्फत गोल गरेपछि युभेको अपराजित यात्रा कायम रहने पक्का भएको थियो । उडीनेजेका लागि खेलको ६ मिनेट समय बाँकी रहँदा केभीन लासाग्नाले सान्तवना गोल गरे ।

रोनाल्डोले यस सिजन पहिलो पटक युभेन्टसको लागि विश्राम पाएका हुन् । सन् २०११ यता सबै लिग उपाधि जितेको युभेले अपराजित यात्रा कायम गर्दै लिगको शीर्ष स्थानमा १९ अंकको अग्रता लिएको छ । युभेले अब मंगलबार च्याम्पियन्स लिगको प्रि-क्वाटरफाइनलको दोस्रो लेगको खेलमा एटलेटिको म्याड्रिडको सामना गर्नेछ । पहिलो लेगमा युभे २-० ले पराजित भएको थियो ।