एजेन्सी – रहिम स्ट्रलिङको ह्याट्रिक सहयोगमा शीर्षस्थानको म्यानचेस्टर सिटीले इंग्लिस प्रिमियर लिग फुटबलमा सहज जित निकालेको छ । प्रिमियर लिग अन्तरगत शनिबार राति भएको खेलमा सिटीले वाटफोर्डलाई ३–१ ले पराजित गरेको हो ।
घरेलु टोलीलाई सिटीले पहिलो हाफमा बराबरीमा रोकेपनि दोस्रो हाफमा रोक्न सकेन । रहिमले १४ मिनेटको अन्तरमा ह्याट्रिक पुरा गर्दै सिटीको जित पक्का गरे ।
४६औं मिनेटमा रहिमले पहिलो गोल गरेका थिए । ५०औं मिनेटमा रियाद महारेजको पासमा रहिमले व्यक्तिगत दोस्रो गोल गरे । ५९ औं मिनेटमा रहिमले डेभिड सिल्भाको पासलाई सदुपयोग गर्दै ह्याट्रिक पुरा गरे । ६६औं मिनेटमा वाटफोर्डका जेरार्ड डेउलोफिउले गोल गर्दै गोल अन्तर कम गरेपनि हार टार्न सकेन ।
जितसँगै सिटीले दोस्रो स्थानको लिभरपुलसँग ४ अंकको अग्रता बनाएको छ । यद्दपि लिभरपुलले एक खेल कम खेलेको छ ।
सिटीको ३० खेलकाट ७४ अंक पुगेको छ । एक खेल कम खेलेको लिभरपुलको ७० अंक रहेको छ । पराजित वाटफोर्ड ४३ अंकसहित आठौं स्थानमा छ ।
