एजेन्सी – कप्तान लिओनेल मेसीले सानदार ह्याट्रिक गरेपछि बार्सिलोनाले स्पेनिस ला लिगा अन्तर्गत आइतबार रियल बेटिसलाई ४-१ ले पराजित गरेको छ । यससँगै बार्सिलोनाले शीर्षस्थानमा १० अंकको अग्रता कायम गरेको छ ।

मेसीले खेलको १८ औं मिनेटमा झन्डै २० यार्ड टाढाबाट उत्कृष्ट फ्रिकिक गोल गर्दै अग्रता दिलाएका थिए । मेसीले प्रहार गरेको फ्रिकिक गोलरक्षक पाउ लोपेजले ठम्याएपनि त्यहाँसम्म पुग्न भने सकेनन् । पहिलो हाफको इन्ज्युरी समयमा मेसीले लुइस सुआरेजको ब्याकहिल पासलाई आफ्नो खुट्टाको टुप्पोले प्रहार गर्दो दोस्रो गोल गरे । सुआरेजको ब्याकहिल पासले तीन डिफेन्डर बिट भएका थिए ।

दोस्रो हाफको ६३ औं मिनेटमा सुआरेजले एकल प्रयासमा गोल गर्दै स्कोर ३-० को स्थितिमा ल्याए । बेटिसका लोरेन मोरोनले ८२ औं मिनेटमा एक गोल फर्काए । तर मेसीले त्यसको तीन मिनेटमा नै गोल गर्दै ला लिगामा आफ्नो व्यक्तिगत ३३ औं ह्याट्रिक पूरा गरे । मेसीले पेनाल्टी क्षेत्रभित्रबाट गरेको प्रहारले गोलरक्षक लोपेजलाई छक्याउँदै पोस्टको दिशा लिएको थियो ।

यस जितसँगै बार्सिलोनाले २८ खेलमा ६६ अंक जोडेको छ । एटलेटिको म्याड्रिडले २८ खेलमा ५६ तथा रियल म्याड्रिड २८ खेलमा ५४ अंक जोडेर शीर्ष तीनमा अटाएका छन् ।