दिपक बोहोरा, इलाम
पूर्वको प्रतिष्ठित माइभ्याली गोल्डकप प्रतियोगिताको पाँचौं संस्करणको फाइनल खेलका लागी हिमालयन शेर्पा र दाउफिन्स फुटबल क्लब तयार रहेको दुबै क्लबले जानकारी दिएका छन् ।
माइभ्याली गोल्डकपको पाँचौ संस्करणको फाइनल भोली मंगलबार इलामको ठुलो टुडीखेलमा हहुँदैछ । दुवै क्लबले उपाधि आफ्नो हुने दावी गरे । हिमालयन शेर्पा क्लव काठमाडौं र क्यामरुनको दाउफीन्स फूटबल क्लब यो सिजन पहिलो पटक प्रतिस्पर्धा गर्ने भएका हुन । फाइनलको अघिल्लो दिन भएको पत्रकार सम्मेलनमा दुबै टिम फाइनलको लागी तयार रहेको बताए ।
क्यामरुने टिम दाउफीन्स सशक्त रुपमा उत्रने तयारीमा रहेको छ । दाउफीन्सले यो सीजनमा नै नेपालमा तीन उपाधि हात पारेको छ । हिमालयन शेर्पा पनि जारी प्रतियोगिताकै क्रममा साविक विजेता थ्री स्टार क्लवलाई पराजित फाइनल सम्म आइपुगेको छ ।
दुवै टिमका टीम प्रशिक्षक गोल्डकपको उपाधि रक्षा गर्ने दावि प्रस्तुत गरेका छन् । दाउफिन्सका टिम व्यवस्थापक आशिक थापा मगरले विगतदेखि खेलेका खेल तरिका अपनाएर खेल्ने बताए । जित सहजै भए पनि शेर्पालाई कमजोरी आँक्न नसकिने बताए । यता हिमालय शेर्पाका प्रशिक्षक बिजेन्द्र पुडाशैनीले सबै खेलाडीले राम्रो खेलिरहेकाले जित हात पार्ने दावी गरे ।
सबै विभागीय टिम बाहिरिए पछि दाउफिन्सले दर्शकको राम्रो साथ पाएको छ । गत फागुन २६ देखि शुरु भएको माइभ्याली गोल्डकपमा देश विदेशका दश टिम सहभागि भएका थिए । प्रतियोगिताको विजेता टोलीले सात लाख रुपैयाँ हात पार्नेछ ।
