काठमाडौं (हाम्रो खेलकुद) – अखिल नेपाल फुटबल संघ (एन्फा) ले पाँचौ महिला साफ च्याम्पियनसिपको उपविजेता नेपाली महिला राष्ट्रिय फुटबल टोलीलाई जनही १ लाख रुपैयाँले सम्मान गर्ने भएको छ ।
विराटनगरमा शुक्रबार सम्पन्न प्रतियोगिताको फाइनलमा नेपाल भारतसँग ३-१ ले पराजित भएको थियो । शनिबार विराटनगरमै भएको एन्फाको वार्षिक साधारण सभाले महिला टोलीलाई १ लाख रुपैयाँले सम्मान गर्ने निर्णय गरेको हो । यस्तै प्रदेश १ सरकारले जनही १ लाख र विराटनगर महानगरपालिकाले जनही ५० हजार रुपैयाँ दिने घोषणा गरेकोमा एन्फाले दुवै पक्षलाई धन्यवाद पनि दिएको छ । एन्फाले प्रतियोगिता भव्यरुपमा सफल पार्न सहयोग गर्ने सबै पक्षलाई धन्यवाद ज्ञापन गरेको छ ।
साधारण सभाले २०७४/७५ को आर्थिक प्रतिवेदन सर्वसम्मत अनुमोदन गर्दै २०७५/७६ का लागि प्रस्तावित २३ करोड ७४ लाख ५० हजार रुपैयाँको बजेटमा छलफल गर्दै परिमार्जनसहित स्वीकृत गरेको छ । सभाले खोटाङ, नवलपुर र मनाङ जिल्लामा फुटबल संघ गठन गर्दै एक वर्षका लागि पर्यवेक्षण गर्ने रुपमा अस्थायी सदस्यता प्रदान गरेको छ ।
