एजेन्सी – जर्मन च्याम्पियन बायर्न म्युनिखले क्लबको हालसम्मकै कीर्तिमानी रकम खर्चेर
फ्रान्सका युवा प्रतिभा तथा स्पेनिस क्लब एटलेटिको म्याड्रिडका डिफेन्डर लुकास हर्नान्डेजलाई भित्र्याउने भएको छ ।
बायर्नले २३ वर्षीय विश्वकप विजेता डिफेन्डरलाई ८० मिलियन युरो खर्चंदै ५ वर्षको सम्झौता गरेको हो । उनले जुलाई १ देखि क्लबमा प्रशिक्षण थाल्नेछन् । बायर्नमा स्वास्थ्य परिक्षण गर्दा दायाँ घुँडाको लिगामेन्टमा समस्या देखिएपछि उनले बुधबार नै शल्यक्रिया गरेका छन् । एटलेटिकोबाट ६७ खेल खेल्दै उनले युरोपा लिग र यूईएफए सुपर कप उपाधि जितेका छन् ।
फ्रान्सका लागि विश्वकप जितेका हर्नान्डेजले उक्त प्रतियोगिताका सबै खेल खेलेका थिए । उनले बायर्नमा आउनु करिअरकै राम्रो दिन रहेको बताए । ‘यो मेरो करिअरको महत्त्वपूर्ण दिन हो । बायर्न युरोपकै उत्कृष्ट क्लबमा पर्छ । म अब बायर्नको जर्सीमा सम्भव भएका सबै उपाधि जित्ने प्रयास गर्नेछु,’ उनले भने ।
