काठमाडौं (हाम्रो खेलकुद) – टोकीयो ओलम्पिक २०२० अन्तर्गत एसिया छनोटको दोस्रो चरणअन्तर्गत समूह ‘ए’ पहिलो खेलमा नेपालले बुधबार आयोजक म्यानमारको सामना गर्दैछ । नेपालसँगै समूह ‘ए’ मा आयोजक म्यानमार, भारत र इन्डोनेसिया रहेका छन् ।

पछिल्लो समय नेपाल र म्यानमारले एक आपसमा तीन पटक खेलेका छन् । पहिलो चरणमा म्यानमारलाई १-१ को बराबरीमा रोकेको नेपालले त्यसपछि हिरो गोल्डकपमा भने दुवै खेल गुमाएको थियो । दोस्रो चरणको छनोटबाट एक टोली मात्र अगाडी बढ्ने हुनाले यस खेललाई निकै महत्त्वका साथ हेरिएको छ । पहिलो खेलमा पराजित भएमा दोस्रो चरण पुग्ने सम्भावना न्यून हुनेछ ।

छनोटको अन्य दुई समूहमा पनि ४-४ टोली रहेका छन् । समूह ‘बी’ मा हङकङ, जोर्डन, भिएतनाम र आयोजक उज्बेकिस्तान रहेका छन् । समूह ‘सी’ मा भने इरान, फिलिपिन्स, चाइनिज टाइपेइ र आयोजक प्यालेस्टाइनले प्रतिस्पर्धा गर्नेछन् । प्रत्यक समूह शीर्ष टोलीले तेस्रो चरणका लागि छनोट हुनेछन् ।

तेस्रो चरणमा छनोट हुने तीन टोलीले अष्ट्रेलिया, चीन, उत्तर कोरिया, दक्षिण कोरिया र थाइल्याण्डसँग अन्तिम दुई स्थानका लागि प्रतिस्पर्धा गर्नेछन् । जापान आयोजकका रुपमा छनोट भइसकेको छ ।

नेपाल गत नोभेम्बरमा भएको पहिलो चरणको छनोटमा समूहको उत्कृष्ट तेस्रो टोली बन्दै दोस्रो चरणमा स्थान बनाएको थियो । छनोटमा अपराजित रहेको नेपालले भारत, म्यानमार र बंगलादेशसँग समान १–१ को बराबरी खेलेको थियो ।