एजेन्सी – फ्रान्स तथा पेरिस सेन्ट जर्मेन (पीएसजी) का युवा फरवार्ड केलियन एमबाप्पेले अर्काे सिजन पनि पीएसजीमै रहने बताएका छन् ।

लिग वानमा मोनाकोलाई ३–१ ले पराजित गर्दै पीएसजीलाई लिग च्याम्पियन बनाएसँगै एमबाप्पेले आफू अर्काे सिजन पनि पीएसजीमै रहने बताएका हुन् । मोनाकोविरुद्ध एमबाप्पेले ह्याट्रिक पुरा गरेका थिए ।

पीएसजीलाई च्याम्पियन बनाएसँगै अब कता भन्ने मिडियाको प्रश्नमा एमबाप्पेले भने, ‘म पिएसजीमै रहनेछु ।’ एमबाप्पे मोनाकोमा रहँदै स्पेनिस क्लब रियल म्याड्रिडले उनलाई अनुबन्ध गर्ने प्रयास थालेको थियो । तर, उनी पीएसजीतर्फ लागेका थिए ।

रियलमा पुनः जिनेदिन जिदान फर्किएपछि एमबाप्पेसहति अन्य खेलाडीहरुलाई रियलले अनुबन्ध गर्ने प्रयास सुरु गरेको थियो । सुपरस्टार रोनाल्डोले सिजनको सुरुमै रियल छाडेपछि रियल निकै कमजोर देखिएको छ । रियलले यो सिजन खराव प्रदर्शन गरेपछि रियल पुरै टिम बनाउने तयारीमा छ ।

२० वर्षीय युवा फरवार्ड एमबाप्पे लिग वानमा ३० गोलसहित सर्वाधिक गोलकर्ताको सुचीमा छन् । ‘ हो म पीएसजी मै पक्का रहनेछु,’ क्यानल प्लसको अन्र्तवार्तामा एमबाप्पेले भने, ‘म पीएसजीको परियोजनामा छु । रियल मड्रिड निकै राम्रो टोली हो । किनकी उनीसँग जिनेदिन जिदानजस्ता उत्कृष्ट प्रशिक्षक छन् । म रियलको हरेक खेल हेर्ने गरेको छु । तर अहिले मेरो भविष्य पीएसजीमै छ । ’