एजेन्सी – क्याटलान क्लब बार्सिलोना स्पेनिस ला लिगाको उपाधि नजिक पुगेको छ । ला लिगा अन्तर्गत मंगलबार राति भएको खेलमा डिर्पाेटिभो अलाभेसलाई २–० ले पराजित गर्दै बार्सिलोना उपाधि नजिक पुगेको छ ।
बार्सिलोनालाई च्याम्पियन बन्न मात्रै एक जितको खाँचो छ । अब आइतबार लेभान्टेलाई पराजित गर्न सके बार्सिलोना ३ खेल अगावै ला लिगा च्याम्पियन बन्नेछ ।
३४औं चरणको खेल जारी रहँदा बार्सिलोनाले दोस्रो स्थानको एट्लेटिको मड्रिडसँग १२ अंकको तथा रियल मड्रिडसँग १६ अंकको फराकिलो अग्रता लिएको छ । बार्सिलोनाको ३४ खेलबाट ८० अंक पुगेको छ । एक खेल कम खेलेको एट्लेटिकोको ६८ तथा रियलको ६४ अंक छ । अलाभेस ४६ अंकसहित आठौं स्थानमा छ ।
अलाभेसको मैदानमा बार्सिलोनाले बल पोजेसन राखेपनि गोलको लागि दोस्रो हाफ नै कुर्नुपरेको थियो । ५४औं मिनेटमा कार्लेस एलेनाले सर्जि रोबर्टाेको पासमा गोल गर्दै बार्सिलोनालाई अग्रता दिलाए ।
६०औं मिनेटमा लुइस सुआरेजले गोल गर्दै बार्सिलोनालाई २–० को जित दिलाएर ला लिगाको उपाधि नजिक उभ्याए । जेरार्ड पिकेले गोल गरेपनि त्यो भन्दा अघि थोमस पिनाको ह्यान्ड भएपछि रेफ्रीले भिएआरको सहायतामा बार्सिलोनालाई पेनाल्टी प्रदान गरेको थियो । दुई गोल पश्चात बार्सिलोनाले कप्तान लियोनेल मेस्सीलाई मैदान उतारेपनि थप गोल भने गर्न सकेन ।
अब बार्सिलोनाले लेभान्टेसँगै सेल्टा डि भिगो, गेटाफे र इवारसँग खेन बाँकी छ ।
