काँकडभिटा (हाम्रो खेलकुद) – विदेशी टोली क्यामरुनको दाउफिन्स फुटबल क्लबसँग दुई गोलले पछाडी परेको स्थितिलाई उल्टाउँदै आयोजक काँकडभिटा फुटबल ट्रेनिङ सेन्टर मेची नेत्रालय गोल्डकपको क्वाटरफाइनलमा प्रवेश गरेको छ ।
निर्धारित समयको खेल २–२ गोलको बराबरीमा सकिएपछि टाइब्रेकरमा काँकडभित्ताले ४–२ को जित दर्ता गरेको छ । टाइब्रेकरमा आयोजक काँकडभिटाका निरज बस्नेत, पुजन उपरकोटी, विकास राई, निशान लिम्बुले गोल गरेका थिए । योगेश गुरुङको प्रहार दाउफिन्सका गोलरक्षक प्रिसोले रोकेका थिए । दाउफिन्सको तर्फबाट गोल किपर प्रिसो र विइक विइकले गोल गरेका थिए । शिलो मार्टिन र पेटेङगाको प्रहार बाहिरिएपछि दाउफिन्स पहिलो खेलबाटै बाहिरिएको हो ।
त्यसअघि काँकडभिटा माविको खेल मैदानमा बिहीबार भएको खेलमा दाउफिन्सका ओगेन जुनियरले गोल गर्दै सुरुवाती अग्रता दिलाएका थिए । मेसुकेको कडा प्रहार आयोजकका गोलरक्षक किशोर गिरीले पञ्च गरेर बचाएपनि रिवाउन्डमा जुनियरले गोल गरे । २०औं मिनेटमा जुनियरले नै गोल गर्दै अग्रता दोब्बर बनाए । अनमार्क रहेका जुनियरले एकल प्रयासबाट गरेको प्रहार आयोजकका गोलक्षक गिरीले जोगाउन सकेनन् ।
सुरुमै २–० ले पछि परेपनि आयोजकले २१औं मिनेटमा नगेन तामाङले गोल गर्दै आयोजकलाई खेलमा फर्काउने संकेत दिएका थिए । दाउफिन्सका खेलाडी बिट भइसकेको अवस्थामा अनमार्क रहेका तामाङले गरेको प्रहारले पोष्टको जाली चुमेको थियो । पहिलो हाफको इन्ज्युरी समयमा नगेनले गोल गर्दै खेललाई २–२ को बराबरीमा ल्याएका थिए । दाउफिन्सका खेलाडीले अफसाइड अपिल गर्दै छोडेको बललाई तामाङले पोष्टको दिशा दिएका थिए ।
नगेन तामाङ खेलको म्यान अफ दि म्याच घोषित हुदै ११ हजार रुपैयाँ पाए । शुक्रबार धरान फुटबल क्लब सुनसरी र च्यासल युथ क्लब काठमाडौबीच खेल हुनेछ । प्रतियोगिताको विजेताले १० लाख १ हजार र उपविजेताले ५ लाख १ हजार रुपैंयाँ पुरस्कार पाउने आयोजकले जनाएको छ । प्रतियोगितामा नेपालका आठ, पारो एफसी भुटान र क्यामरुनको दाउफिन्स फुटबल क्लबको सहभागिता रहेको छ ।
