एजेन्सी – हडर्सफिल्डमाथि फराकिलो जित निकाल्दै लिभरपुल इंग्लिस प्रिमियर लिगको शीर्ष स्थानमा उक्लिएको छ ।
जितसँगै लिभरपुलले म्यानचेस्टर सिटीलाई २ अंकले पछि पारेको छ । लिभरपुलको ३६ खेलबाट ९१ अंक पुगेको छ । एक खेल कम खेलेको सिटीको ८९ अंक छ । शीर्ष दुई टोलीको लगातारको जितले प्रिमियर लिगको उपाधि होड थप रोमाञ्चक बनेको छ ।
प्रिमियर लिगमा च्याम्पियन बन्न लिभरपुललाई शतप्रतिशत जितको आवश्यकता रहँदा सिटीले अंक गुमाउनु पर्ने हुन्छ । शतप्रतिशत जित निकाले सिटी च्याम्पियन बन्नेछ ।
घरेलु मैदान एनफिल्डमा लिभरपुलले शुक्रबार राति भएको खेलम हडर्सफिल्डलाई ५–० को फराकिलो गोल अन्तरले पराजित गरेको हो । लिभरपुलको फराकिलो जितमा मोहम्मद सलाह र साडियो मानेले समान २–२ तथा नेवी केइटाले एक गोल गरे ।
खेलको पहिलो मिनेटमा नै नेवी केइटाको गोलबाट लिभरपुलले खेलमा अग्रता लिएको थियो । उनले मोहम्मद सलाहको पासमा गोल गरेका थिए । २३औं मिनेटमा साडियो मानेले गोल गर्दै लिभरपुलको अग्रता दोब्बर पारे । उनले एन्ड्रिउ रोबर्टसनको पासमा गोल गरेका थिए ।
पहिलो हाफको इन्ज्युरी समयमा अर्नाेल्डको पासमा मोहम्मद सलाहले गोल गर्दा लिभरपुलले पहिलो हाफमै ३–० को आरामदायी अग्रता बनाएको थियो ।
६६औं मिनेटमा मोहम्मद सलाहले व्यक्तिगत दोस्रो तथा टिमका लाथि चौथो गोल गर्दा लिभरपुल फराकिलो जितर्फ अग्रसर बन्यो । ८३औं मिनेटमा मोहम्मद सलाहले व्यक्तिगत दोस्रो तथा टिमका लागि पाँचौ गोल गर्दै लिभरपुललाई ५–० को फरासकलो जित दिलाए ।
३६औं राउन्डमा सिटीले बर्नलीसँग आइतबार प्रतिस्पर्धा गर्दैछ । यो खेलमा जित हात पारे सिटी पुनः शीर्षस्थानमा उक्लनेछ ।
