पोखरा (हाम्रो खेलकुद)– निर्वाचन भएको झन्डै १६ महिनापछि अखिल नेपाल फुटबल प्रशिक्षक संघको कार्यसमितिले पूर्णता पाएको छ ।

विनोद लामाको अध्यक्षमा शनिबार पोखरामा बसेको बैठकले सर्वसम्मतमा महासचिव र कोषाध्यक्ष मनोनयन गरेसँगै संघको १५ सदस्यीय कार्यसमितिले पूर्णता पाएको हो । महासचिवमा राष्ट्रिय फुटबल टोलीका उप कप्तान समेत रहेका राजेश खड्गी र कोषाध्यक्षमा पूर्व खेलाडी एवंम् प्रशिक्षक उर्जन श्रेष्ठ मनोनित भएका हुन् ।

संघको निर्वाचन २०७४ माघ २३ गते भएको थियो । अखिल नेपाल फुटबल संघ (एन्फा) अन्तर्गत रहेको प्रशिक्षकसँगको कार्यकाल पनि ४ वर्षको हुने गर्दछ । प्रशिक्षक संघबाट एक जनाले एन्फाको साधारण सभामा मतअधिकार प्राप्त गर्नेछन् ।

शाही २०५३ सालदेखि फुटबलमा आबद्ध भएका थिए । हाल बी डिभिजन क्लबमा रहेको आरसिटीबाट व्यवासायिक फुटबल खेल्न सुरु गरेको शाहीले लामो समय सिग्नेचर मनाङ मस्र्याङ्दी क्लबमा बिताएका थिए । त्यसपछि उनी रुस्लान थ्री स्टार क्लबमा आबद्ध भएका थिए । मनाङ र थ्री स्टारमामा उनले समान ६ वर्ष खेले । २०६४ मा रुपक स्मृति पुरस्कार जितेका खड्गी एएफसी ‘सी’ लाइसेन्स उतिर्ण गरेका छन् ।

त्यस्तै श्रेष्ठ लामो समय थ्री स्टारमा रहे । उनले थ्री स्टारबाट दुई पटक ए डिभिजन लिग उपाधि जितेका थिए । उनी एएफसी ‘ए’ लाइसेन्स प्राप्त प्रशिक्षक हुन् । कार्यसमिति बैठकले संघको कोष बृद्धिका लागि विभिन्न कार्यक्रम गर्ने निर्णय गरेको संघका अध्यक्ष लामाले बताए ।