म्यानचेस्टर (एजेन्सी)– भिन्सेन्ट कम्पोनीले ११ वर्षपछि म्यानचेस्टर सिटी छाड्ने भएका छन् । दशक लामा यात्रामा उनले क्लबबाट १० वटा उपाधि जितेका छन् ।
सिटीका लागि उनको अन्तिम खेल आइतबारको रह्यो । जहाँ वार्टफोर्डलाई ६–० ले हराउँदै सिटीले एफए कप जितेको थियो । त्योसँगै सिटीले यो सिजन कम्पोनीको कप्तानीमा प्रिमियर लिग, लिग कपसहित तीनवटा उपाधि जितेको थियो ।
३३ वर्षे उनले क्लब छाड्ने पक्का भएपनि अबको गन्तव्य कता हुने भन्ने अहिले सम्म टुंगो लागि सकेको छैन । क्लबका अध्यक्ष खाल्डुन अल मुबारकले कम्पोनीको खुलेर प्रशंसा गरेका छन् ।
‘क्लबलाई योगदान दिने थुप्रै खेलाडी छन् ,’ उनले भने,‘ तर, त्यसमा कोम्पनी भन्दा महत्वपूर्ण अर्को कोहि हुन सक्दैन । उनी क्लबको मुख्य खेलाडीका रुपमा लामो समय रहे ।
कम्पोनीको कप्तानीमा सिटीले ४ पटक प्रिमियर लिग उपाधि जितेको थियो । ‘उनको नेतृत्व, समर्पणले उनलाई अलग खेलाडीका रुपमा स्थापित गर्यो, ’ अध्यक्षले भने,‘ उनी बेग्लै क्षमता भएका खेलाडी हुन् । उनले चार अलग अलग प्रशिक्षकसँग काम गरे । चोटले पनि उनलाई दुःख दियो । त्यसका वावजुद पनि उनले आफ्नो समर्पण निरन्तर देखाए ।
सेन्टर ब्याक उनी सन् २००८ मा सिटीमा आबद्ध भएका थिए । उनले सिटीमा ४ प्रिमियर लिग उपाधि, २ एफए कप र ४ लिग कपको उपाधि जिते । उनले सिटी समर्थकर्लाइ लेखेका छन् ,‘ लगातार लिग कप विजेता, लगातार इग्ल्यान्डको विजेता र एफए कप विजेता । यो सिजन हाम्रो लागि साच्चै उत्कृष्ट रह्यो । सिटीमा म ११ वर्ष रहे । म आफैलाई विश्वास छैनकी सिटीमा यो मेरो अन्तिम सिजन हो । कुनै पनि समय मैले छोड्ने विषयमा सोचेको थिइन । सिटीले मलाई सबै चिज थियो । मैले जति सके दिने कोसिश गरे । अब जाने समय आएको छ ।’
