पेरिस (एजेन्सी)– पेरिस सेन्ट जर्मेन (पिएसजी) का फरवार्ड इडिन्सन काभानी अझै फ्रेन्च च्याम्पियन टोलीमा रहन चाहेको प्रष्ट पारेका छन् । यद्दपी भविष्यका विषयमा बोर्डले गर्ने निर्णय पर्खने बताएका छन् ।

काभानीको पिएसजीमा यो छैटौं सिजन हो । उनले सबै खाले प्रतियोगितामा गरि क्लबका लागि २ सय गोल गरेका छन् । उरुग्वेली स्टारले पिएसजीलाई लिग उपाधि र कप जिताउन भूमिका खेल्दै आएका छन् । उनले पिएसजीमा रहँदा एक सिजन मात्र लिग १ को उपाधि जित्न सकेनन् । नेयमार र एमबाप्पेसँग बलियो आक्रमण जोडी बनाएका काभानीले यस सिजन चोटका कारण धेरै खेल गुमाएका थिए ।

क्लबसँगको उनको सम्झौता अझै एक वर्ष बाँकी छ । तर पनि उनी भविष्यलाई लिएर निश्चित छैनन् । ‘समर्थकहरुको साथमा म निकै खुसी छु । यसले झनै बढी उत्साहित बनाउने गर्दछ,’ काभानीले भने, ‘सबै चिज काम, शिक्षा र व्यावसायिकतामा आधारित हुन्छ । समर्थकले हामीलाई परिचय दिन्छन् । म ती सबै समर्थकप्रति आभार व्यक्त गर्न चाहन्छु ।’

उनले क्लबसँगको सम्झौताको सम्मान गर्ने बताएका छन् । ‘म सम्झौता सम्म बस्न चाहन्छु । तर यो सिजनको अन्त्यपछि के हुन्छ हेरौं,’ उनले भने, ‘म बस्न चाहन्छु । मलाई यो क्लब मन पर्छ । यो सहर र यहाँको जीवन मलाई मनपर्छ । फुटबलमा आफुले चाहे जस्तो मात्र हुँदैन । बोर्ड पनि छ । तर म आफ्नो सम्झौता हुँदा सम्म बस्न चाहन्छु । ‘