एजेन्सी – युरोकप छनोटमा ग्यारेथ बेलको कप्तानीमा रहेको वेल्सले लुका मोड्रीच कप्तान रहेको क्रोएसियासँग पराजित भएको छ । क्रोएसियाको घरेलु मैदानमा शनिबार राति भएको खेलमा वेल्सले २–१ को हार बेहोरेको हो ।
घरेलु टोली क्रेएसियाले खेलको १७औं मिनेटमा जेम्स लरेन्सको आत्मघाती गोलबाट अग्रता बनाएको थियो । पहिलो हाफमा १–० को अग्रता लिएको क्रोएसियाले दोस्रो हाफको सुरुवातमा अर्को गोल गर्दै अग्रता दोब्बर बनायो । ४८औं मिनेटमा इभान पेरिसिकले गोल गरे ।
७७औं मिनेटमा डेभिड ब्रुक्सले गोल गर्दै वेल्सलाई खेलमा फर्काउने प्रयास गरेपनि त्यसपछि थप गोल हुन नसक्दा वेल्सले क्रोएसियालाई २–१ को नतिजा सुम्पियो । जितसँगै समूह ‘ई’ मा क्रोएसिया ३ खेलमा दुई जित निकाल्दै ६ अंक जोडेर दोस्रो स्थानमा छ । वेल्स दुई खेलबाट ३ अंक जोडेर तेस्रो स्थानमा छ ।
यही समूहको अर्काे खेलमा हंगेरीले अजरबैजानलाई ३–१ ले हरायो । हंगेरी ३ खेलमा दुई जितसहित ६ अंक जोडेर शीर्षस्थानमा रहेको छ । अजरबैजान अंकविहीन छ ।
