लन्डन (एजेन्सी)– बेल्जियन सुपर स्टार इडन हाजार्ड लामो प्रतिक्षापछि स्पेनिस सफल क्लब रियल म्याड्रिडमा हालै आबद्ध भएका छन् । चेल्सीबाट उनलाई १ सय ५० मिलियन पाउन्डमा रियलले भित्राएको बताएको छ । उनलाई कतिपयले चेल्सीको क्लब इतिहासमा उत्कृष्ट खेलाडीका रुपमा हेरिएको छ ।
तर, समर्थनका नजरमा भने हाजार्ड उत्कृष्ट खेलाडीको चौथो स्थानमा रहेका छन् । पूर्व स्टार फ्रान्क लाम्पार्ड समर्थकको नजरमा उत्कृष्ट खेलाडी चुनिएका छन् ।
आइभरी कोस्टका डिडिएर ड्रोग्बा उत्कृष्ट खेलाडीको सुचिमा दोस्रो नम्बरमा परेका छन् । प्रभावशाली पूर्व कप्तान जोन टेरी तेस्रो स्थानमा रहेका छन् । २८ वर्षे हाजार्ड चौथो र १३ सय १९ भोटका साथ पिटर चेक पाँचौं स्थानमा छन् ।
सन् २०१२ मा लन्डन क्लब पुगेयता हाजार्ड क्लबका सबैभन्दा प्रभावशाली खेलाडीका रुपमा स्थापित रहेका छन् । उनले क्लबका लागि ३ सय ५२ खेल खेल्ने क्रममा १ सय १० गोल गरेका थिए ।
हाजार्डले गत सिजन मात्र २१ गोल गर्नुका साथै १७ एसिस्ट गरेका थिए । यो पटक चेल्सीलाई युरोपा लिग जिताउनमा पनि उनको भूमिका महत्वपूर्ण रह्यो । फाइनलमा प्रिमियर लिग प्रतिद्वन्द्वि आर्सनललाई ४–१ ले हराउँदा हाजार्डले २ गोल गरेका थिए ।
समर्थकको नजरमा चेल्सीको इतिहासका शीर्ष १० खेलाडी
१. फ्रान्क लाम्पार्ड
२. डिडिएर ड्रोग्बा
३. जोन टेरी
४. इडन हाजार्ड
५. पिटर चेक
६. गियनफ्रान्को जोला
७. क्लाउडे माकालेले
८.एनगोलो कोन्टे
९.एस्ले कोल
१०. माइकल इसियन
