एजेन्सी – युरो छनोटमा स्पेनले शतप्रतिशत नतिजा निकालेको छ । सान्टियागो बर्नबेउमा सोमबार राति भएको खेलमा स्पेनले स्वीडेनलाई ३–० ले पराजित गर्दै शतप्रतिशत नतिजा निकालेको हो ।

सहज जितसँगै अपराजित रहेको स्पेनको समूह ‘एफ’ मा ४ खेलबाट १२ अंक पुगेको छ । छनोटमा पहिलो हार बेहोरेको स्वीडेन ७ अंक जोेडेर दोस्रो स्थानमा यथावत रहेको छ ।

स्पेनको सहज जितमा कप्तान सर्जियो रामोस, अल्भेरो मोराटा र मिकेल ओएरजवालले गोल गरे । प्रतिस्पर्धात्मक बनेको खेलको सबै ३ गोल दोस्रो हाफमा सम्भव भएको थियो । लगातार स्वीडेनलाई दवावमा राखेको स्पेनले गोलको लागि पेनाल्टीको साहरा लिनुपरेको थियो ।

खेलको ६४औं मिनेटमा कप्तान रामोसले पेनाल्टीमा गोल गर्दै स्पेनालाई अग्रता दिलाए । मार्काे एसेन्सियाको क्रसमा सेवास्टिन लार्सनले ह्यान्ड गरेपछि स्पेनले पेनाल्टीको मौका पाएको थियो । जसलाई कप्तान रामोसले कुनै गल्ती गरेनन् ।

८५औं मिनेटमा वैकल्पिक खेलाडीको रुपमा मैदान मोराटाले गोल गर्दै स्पेनको अग्रता दोब्बर बनायो । आफैलाई फिलिप हेलेन्डरले लडाएपछि प्राप्त पेनाल्टी पाएका थिए । ८७औं मिनेटमा अर्का वैकल्पिक खेलाडी मिकेलले गोल गर्दै स्पेनलाई ३–० को सहज जित दिलाए ।

यही समूहको अर्काे खेलमा रोमानियाले माल्टालाई ४–० को फराकिलो जित निकाल्यो । रोमानियाको फराकिलो जितमा जर्ज पुकासले दुई तथा एलेक्ससान्द्रु चिपसियु र डेनिस म्यानले समान १ गोल गरे ।

रोमानिया अन्तिम ११ मिनेट १० खेलाडीमा समेटिएको थियो । रोमानियाका एलेक्ससान्द्रु चिपसियु ८१औं मिनेटमा दोहोरो कार्ड खादै मैदानबाट बाहिरिएको थियो । जितसँगै रोमानियाको ४ खेलबाट ७ अंक पुगेको छ । माल्टा ३ अंकसहति पाँचौ स्थानमा छ ।

अर्काे खेलमा नर्वेले फारोअ आइल्यान्डलाई २–० ले हरायो । जितसँगै नर्वे ५ अंक जोडेर चौथो तथा आइल्यान्ड अंकविहीन हुदै पुछारमा छ ।