काठमाडौं (हाम्रो खेलकुद)– फिफाको नयाँ वरियतामा नेपाल चार स्थान तल झरेको छ । विश्व फुटबल महासंघ (फिफा) ले जुनका लागि जारी शुक्रबार जारी गरको वरियतामा नेपाल १ सय ६५ औं स्थानमा पुगेको छ । यसअघि नेपाल १ सय ६१ औं स्थानमा थियो ।
नेपालले दुई वटा मैत्रीपूर्ण खेल खेलेको एक साता भन्दा केहि बढी समयपछि आएको वरियतामा नेपाल खस्केको हो । जेठ १९ मा मलेसियासँगको मैत्रीपूर्ण खेल २–० ले गुमाएको नेपालले जेठ २३ गते चाइनिज ताइपेलाई भने १–१ को बराबरीमा रोकेको थियो ।
नेपालका लागि अभिषेक रिजालले गोल गरेका थिए । उनले आफ्नो दोस्रो खेलमै गोल गरेका थिए । अभिषेकले मलेसियाविरुद्धको खेलमा डेब्यू गरेका थिए ।
फिफा वरियता अनुसार दक्षिण एसियामा भने नेपाल तेस्रो स्थानमा रहेको छ । भारतमा एक सय एक र माल्दिभ्स १ सय ५१ औं स्थानमा छ । एसियाली मुलुकमा भने ४६ मध्ये नेपाल ३५ औं स्थानमा छ ।
दक्षिण एसियाका अन्य मुलुकमा बंगलादेश १ सय ८३ औं, भुटान १ सय ८६ औं, श्रीलंका २ सय १ र पाकिस्तान २ सय ३ औं स्थानमा छ ।
बेल्जियम फिफा वरियताको शीर्ष स्थानमा रहँदा विश्व कप विजेता फ्रान्स दोस्रो, ब्राजिल तेस्रो, इग्ल्यान्ड चौथो र पोर्चुगल पाँचौं स्थानमा छ ।
