काठमाडौं (हाम्रो खेलकुद)-राष्ट्रिय महिला खेलाडी पुजा राना एक्लैको १० गोल सहयोगमा बासगढी नगरपालिका बर्दियाले प्रथम उपमेयर कप अन्तर नगरपालिका महिला फुटबल प्रतियोगितामा शम्भुनाथ नगरपालिकामाथि फराकिलो जितसहित प्रतियोगितामा पहिलो जित हात पारेको छ ।
बासगढी पहिलो खेलमा तुल्सीपुरसँग २–२ गोलको बराबरीमा रोकिएको थियो । हल्चोकस्थित सशस्त्र प्रहरी बल (एपीएफ) को खेल मैदानमा आइतबार भएको खेलमा बासगढीले शम्भुनाथ नगरपालिकामाथि १९–० को फराकिलो जित निकालेको हो ।
बासगडीको फराकिलो जितमा राष्ट्रिय तथा यु–१९ राष्ट्रिय महिला टोलीका सदस्य पुजा रानाले तेहोरो ह्याट्रिकसहित १० गोल गरिन् । लक्ष्मी चन्द र सुरक्षा सुखरियाले ह्याट्रिक पुरा गरिन् । अन्जना रानामगरले दुई तथा नानुमाया क्षेत्रीले १ गोल थपिन् ।
अर्काे खेलमा वालिङ नगरपालिका स्याङ्जाले घोराही नगरपालिका दाङमाथि ५–० को जित निकाल्दै लगातार दोस्रो जित निकाल्न सफल भयो । वालिङको जितमा अस्मिता रानपालले २ गोल गरिन् । शान्ता नेपाली, सरस्वती हमाल र मनमाया दमाईले समान १ गोल गरिन् ।
लगातार दोस्रो जितसँगै वालिङ समूह ‘ए’ मा एक खेल बाँकी रहँदा ६ अंक जोडेर शीर्षस्थानमा रहेको छ । दोस्रोमा रहेको बासगढीको ४ अंक रहेको छ । बासगढी र वालिङबीचको विजेताले समूह ‘ए’ बाट सेमिफाइनलमा स्थान बनाउनेछ ।
प्रतियोगितामा सोमबार तीन खेल हुनेछ । पहिलो खेलमा बासगढी र वालिङ, दोस्रो खेलमा बाह्रविसे र भीमेश्वर, तथा काठमाडौं र चन्द्रपुर नगरपालिकाबीच खेल हुनेछ ।
