काठमाडौं (हाम्रो खेलकुद) – वालिङ नगरपालिका स्याङ्जा समूह विजेता बन्दै प्रथम उपमेयर कप अन्तर नगरपालिका महिला फुटबल प्रतियोगिताको सेमिफाइनलमा प्रवेश गरेका छन् ।

हल्चोकस्थित एपीएफ क्लबको खेल मैदानमा सोमबार भएको समूह ‘ए’ को अन्तिम खेुलमा वालिङ नगरपालिका र बासगढी नगरपालिकाले गोल रहित बराबरी खेल्दै अंक बाँडेपछि वालिङ अपराजित रहेको समूह विजेता बन्दै अन्तिमा चारमा पुग्न सफल भएको हो ।

वालिङले पहिलो खेलमा शम्भुनाथलाई ११–० ले तथा दोस्रो खेलमा घोराहीमाथि ५–० को जित निकालेको थियो । सेमिफाइनल पुग्न वालिङलाई बराबरी नै पर्याप्त रहेको थियो । वालिङले सोही नतिजा आत्मसात गर्न सफल भयो । यता, बासगढीलाई सेमिफाइनल प्रवेश गर्न जित्नै पर्ने दवाव थियो । तर, बासगढीले नतिजा आफ्नो पक्षमा पार्न नसक्दा समूहबाटै बाहिरियो ।

बासगढी पहिलो खेलमा तुल्सीपुरसँग २–२ गोलको बराबरीमा रोकिदा दोस्रो खेलमा शम्भुनाथ नगरपालिकामाथि १९–० को जित निकाल्दै सेमिफाइनलमा पुग्ने सम्भावना जीवितै राखेको थियो । तर, अन्तिम खेलमा नतिजा आफु अनुकुल पार्न सकेनन् ।
अपराजित रहेको वालिङले समूह ‘ए’ मा ३ खेलबाट ७ अंक जोड्यो । दोस्रोमा रहेको बासगढीको ५ अंक जोड्यो । यो समूहबाट बासगढीसँगै घोराही र शम्भुनाथ नगरपालिका पनि समुह चरणबाटै बाहिरिए ।

आयोजकले एक समूहबाट एक टोली मात्रै सेमिफाइनल पुग्ने नियम राखेको थियो । आज दोस्रो खेलमा बाह्रविसे र भीमेश्वर, तथा काठमाडौं र चन्द्रपुर नगरपालिकाबीच खेल हुनेछ ।