एजेन्सी – स्पेनिस क्लब रियल म्याड्रिडले ब्राजिलका युवा फरवार्ड रोड्रिगोलाई सार्वजनिक गरेको छ ।

रियलले गत वर्ष नै रोड्रिगोलाई ४० मिलियन पाउन्डमा अनुबन्ध गर्न सान्तोषसँग सहमति गरिसकेका थिए । सोही सहमतिलाई रियलले मंगलबार सार्वजनिक गरेको हो । क्लबका अध्यक्ष फियोरेन्टिना पेरेजले सार्वजनिक गरेका थिए ।

१८ वर्षीय रोड्रिगो यो सिजन रियलमा आबद्ध हुने ५ खेलाडीमध्ये हुन् । रियलले लुका जोभिक, इडर मिलिसाओ, फरल्यान्ड मेन्डी र इडेन हजार्डलाई पनि अनुबन्ध गरिसकेका छ ।

सम्भवत रोड्रिगो यो सिजन रियलको रिजर्भ टिममा रहनेछन् । रियलको रिजर्भ टिमले स्पेनको सेगुन्डा ‘बी’ डिभिजन खेल्नेछन् । रोड्रिगोले रियलको अग्रपङ्तिमा करिम बेन्जेमा, भेनेसियस जुनियर, लुका जोभिक र इडेन हजार्डसँग प्रतिस्पर्धा गर्नुपर्ने हुन्छ ।

‘मेरो चाहना रियलबाट खेल्ने थियो । मलाई दोस्रो डिभिजन खेल्नमा कुनै समस्या छैन । मैले एक उत्कृष्ट खेलाडी हजार्डलाई पछ्याएको छु । मैले उनको तस्वीरलाई मोबाइलको लक स्क्रिनमा राखेको छु । मेरो हजार्डसँग खेल्ने सपना पुरा हुदैछ । र यहाँ बेन्जेमा र भेनेसियस जुनियर जस्ता खेलाडीहरु पनि छन् ।’ रोड्रिगोले भने ।

रोड्रिगोले सान्तोषका लागि यो सिजन ३५ खेलमा ८ गोल गरेका छन् । उनले ब्राजिलको यु–२० टोलीबाट प्रतिनिधित्व गरिसकेका छन् ।

यो सिजन खेलाडी अनुबन्धमा मोटो रकम खर्चिसकेको रियलले अझै पनि म्यानचेस्टर युनाइटेडका पल पोग्वालाई अनुबन्ध गर्न प्रयास जारी राखिरहेको छ ।