विराटनगर (हाम्रो खेलकुद)– प्रदेश १ मुख्यमन्त्री कप प्रदेश लिग फुटबल प्रतियोगिता अर्को साताबाट सुरु हुने भएको छ । १४ जिल्लाका टोलीको सहभागिता रहने लिगका खेल ३ जिल्लामा हुनेछन् । असार १६ गतेबाट सुरु हुने प्रतियोगितामा ३३ खेल हुने आयोजक अखिल नेपाल फुटबल संघ (एन्फा) ले जानकारी दिएको छ ।

विराटनगरमा सोमबार आयोजित पत्रकार सम्मेलनमा एन्फाका प्रवक्ता एवं केन्द्रिय सदस्य किरण राईले प्रतियोगिताका लागि प्रदेश सरकारले १ करोड र एन्फाबाट ३३ लाख रुपैयाँ विनियोजन भएको जानकारी दिए । चार स्थानमा आयोजना गरिने प्रतियोगिता अन्तर्गत पहिलो चरणमा प्रतियोगितामा सहभागि १४ टोलीले इलाम, धरान र उदयपुरमा प्रतिस्पर्धा गर्नेछन् । त्यसपछि प्रत्येक स्थानबाट समान २ वटा टोलीले दोश्रो चरणमा स्थान बनाउने र फाइनल खेल विराटनगरस्थित शहिद मैदानमा हुने प्रवक्ता राईले बताए ।

प्रतियोगिताको विजेता टोलीले ५ लाख, दोस्रो हुने टोलीले ३ लाख रुपैयाँ प्राप्त गर्नेछ । पुरस्कार राशी मोफसलमा हुने गोल्ड कपको भन्दा पनि कम रहेको फुटबलकर्मीहरुको गुनासो छ । प्रदेश लिगका लागि १४ वटा टोलीको छनोट कसरी हुने भन्ने विषयमा पनि एन्फाले तयारी गरेको देखिदैन । हाल एन्फा मातहतका सबै जिल्लामा जिल्ला स्तरीय ए डिभिजन लिग सञ्चालन भइरहेको छ ।

जिल्लाबाट कुन प्रकारले मुख्यमन्त्री कप लिगमा सहभागिता जनाउने आफूहरुलाई जानकारी समेत नआएको मोरङ जिल्लाको एक क्लबका पदाधिकारीले बताएका छन् । मुख्यमन्त्री कप प्रदेश लिगका लागि टोली कसरी चयन भयो वा हुनेछ त्यसबारे कुनै सोधखोज नभएको ती पदाधिकारी बताउँछन् ।

‘१४ टोलीबीचको लिग हतारोमा खेलाउन लागेको देखिएको छ,’ झापा जिल्ला फुटबलका पूर्व पदाधिकारीले गुनासो गरेका छन्, ‘मुख्यमन्त्री कपको नाममा प्रतियोगिता गराउँदाको उपाधि, खेलाडी खर्च, टोली खर्च हेर्दा २० लाख भन्दा धेरै खर्च हुने जस्तो देखिदैन । बाँकी रकमको विषयमा एन्फा आफै अन्योलमा देखिएकोछ ।’

लिगमा सहभागी १४ टोलीलाई समान ५० हजार रुपैयाँ दिने बताइएको छ । प्रतियोगितामा तेस्रो, चोथो, पाँचौ र छैटौं हुने टोलीले समान ७५ हजार पाउनेछन् । त्यस्तै प्रतियोगिताको उत्कृष्ट खेलाडीलाई १ लाख, प्रत्येक खेलका म्यान अफ द म्याच लाई ५ हजार, फाइनलको म्यान अफ द म्याचलाई १० हजार रुपैयाँ दिने बताइएको छ । विभिन्न ६ विधाका उत्कृष्ट खेलाडीले २५ हजार रुपैयाँ प्राप्त गर्ने जनाइएको छ ।