एजेन्सी – उपाधिको दावेदार स्पेनलाई पराजित गर्दै अमेरिका महिला विश्वकप फुटबलको क्वाटरफाइनलमा प्रवेश गरेको छ । अमेरिकाले स्पेनलाई २–१ ले पराजित गर्दै अन्तिम आठमा स्थान पक्का गरेको हो ।
फ्रान्सस्थित रेइम्समा भएको खेलमा अमेरिकाको लागि दुवै गोल मेगन रापिनोइले पेनाल्टीमा गरिन् । स्पेनका जेनिफर हरमोसोले एक गोल फर्काइन् ।
खेलको सातौ मिनेटमा नै मेगनले पेनाल्टीमा गोल गर्दै अमेरिकालाई सुरुवाती अग्रता दिलाईन् । तर, त्यो अग्रता दुई मिनेट पनि टिकेन । नवौं मिनेटमा जेनिफर हारमोसोले बराबरी गोल फर्काइन् । उनले लुसिया गार्सियाको पासमा गोल गरेकी थिइन् । बराबरीपछि पहिलो हाफमा अमेरिकाले गोल गर्ने तीन सुन्दर मौका खेर फाल्दा पहिलो हाफ १–१ गोलको बराबरीमा सकिएको थियो ।
दोस्रो हाफमा पनि अमेरिकाले स्पेनलाई दवावमा राखेपनि गोलको लागि पेनाल्टीको साहरा लिनु परेको थियो । ७१औं मिनेटमा अमेरिकाले पेनाल्टीको मौका पायो ।
लेभेलीलाई स्पेनकी टोरीसिल्लाले बक्समा लडाएपछि रेफ्रीले भिएआरको सहायतामा पेनाल्टी दिएको थियो । जसलाई ७६औं मिनेटमा मेगनले सदुपयोग गर्दै अमेरिकालाई २–१ को अग्रता दिलाए । त्यसपछि थप गोल निस्कन नसक्दा अमेरिका विजयी हुन सफल भयो ।
अर्काे खेलमा स्वीडेनले क्यानडालाई १–० ले पराजित गर्दै अन्तिम आठमा स्थान सुरक्षित ग¥यो । स्वीडेनको जितमा खेलको ५५औं मिनेटमा स्टिना ब्लयाकस्टेनसले गरेको एकमात्र गोल नै निर्णायक बन्यो ।
