लन्डन (एजेन्सी)– डर्बी काउन्टीले बाटो खुला गरेपछि चेल्सीले बुधबार क्लबका पूर्व स्टार फ्रान्क लाम्पार्ड नयाँ प्रशिक्षकका रुपमा प्रस्तुत हुने सम्भावना छ । ४१ वर्षे पूर्व खेलाडीलाई चेल्सीले नयाँ प्रशिक्षकका रुपमा तीन वर्षको सम्झौता गर्ने सम्भावना रहेको छ ।
लाम्पार्डलाई प्रशिक्षकका रुपमा क्लबमा भित्राउनका लागि चेल्सीका मालिक रोमन एब्राहिमोभिचले डर्बीलाई ४ मिलियन पाउन्ड क्षतिपूर्ति तिर्ने भएका छन् । च्याम्पियनसिपले मंगलबार विज्ञप्ती जारी गर्दै भनेको छ, ‘डर्बी काउन्टी फुटबल क्लबले चेल्सीलाई लाम्पार्डसँग कुरा गर्न स्वीकृति प्रदान गरेकोछ । रिक्त प्रशिक्षकमा लाम्पार्डलाई भित्राउन चेल्सी इच्छुक रहेको केहि दिन यतादेखि चर्चामा छ ।’
चेल्सीका अर्का पूर्व खेलाडी जोडी मोरिस र क्रिस जोन्स पछि लाम्पार्डसँग चेल्सी जाने बताइएको छ । लाम्पार्डको नेतृत्वमा डर्बीमा सिजन च्याम्पियन्सिप प्ले अफमा एस्टन भिल्लासँग पराजित भएको थियो ।
पूर्व मिडफिल्डर लाम्पार्डले चेल्सीका लागि ६ सय ४८ खेल खेल्ने क्रममा २ स११ गोल गरे । त्यस्तै उनले चेल्सीका लागि तीन पटक प्रिमियर लिगको उपाधि जितेका थिए । त्यस्तै चार वटा एफए कप, दुई पटक लिग कप, समान एक एक पटक च्याम्पियन्स लिग र युरोपा लिग जितेको थियो ।
