दिपक न्यौपाने

बुटवल –यति बेला झरीको मौसम । झमझम पानीमा किसानहरु खेतमा कोहि जोत्दै त कोहि खन्दै गर्ने बेला । मानो रोपेर मुरी फलाउने बेला भन्दै किसानहरु खेतका आली आलीमा भेटिने बेला ।

तर रुपन्देहीको तिलोत्तमा नगरपालिकामा रहेको तिलोत्तमा फुटबल एकेडेमीका सदस्यहरु भने असारको कुनै प्रबाह नगरी फुटबलमा जुटेका छन् । रुपन्देहीको तिलोत्तमा नगरपालिकामा प्रथम तिलोत्तमा मेयर कप फुटबल प्रतियोगिता २०७६ आयोजना गर्ने भन्दै धुमधाम तयारी गरिरहेका छन्।

तिलोत्तमा नगरपालिकाको संरक्षकत्व तथा तिलोत्तमा फुटबल एकेडेमीको आयोजनामा फुटबल प्रतियोगिता गर्ने बुधबार आयोजीत पत्रकार सम्मेलनमा जानकारी गराइएको छ ।

असार १३ गतेबाट हुने प्रतियोगिताको तैयारी पुरा भएको एकेडेमीका अध्यक्ष तिलक नेपालीले हाम्रो खेलकुद डटकमलाइ बताए । युवा खेलाडी उत्पादनको आधार प्रतियोगिता भएको भन्दै स्थानिय सरकारको सहकार्यमा कार्यक्रम गर्न लागेको नेपालीले बताए ।

तिलोत्तमा –१ स्थित चप्परहटी खेलमैदानमा हुने प्रतियोगितामा जिल्लाका १६ टिमले सहभागिता रहने कार्यक्रमका संयोजक घनश्याम श्रेष्ठले बताए । प्रतियोगिताको उपाधि विजेताले नगद १ लाख ११ हजार १ सय ११ तथा उपविजेताले ५५ हजार ५ सय ५५ साथै मेडल, प्रमाणपत्रबाट पुरस्कृत गरिने उनले बताए ।

यसैगरि विद्यागत रुपमा उत्कृष्ट एकएक जना डिफेन्डर, स्टाईकर, गोलकिपर, कोचलाई समेत नगद तथा कपबाट पुरस्कृत गरिने उनले बताए । असार १३ देखि २८ गतेसम्म चल्ने प्रतियोगितामा १२ लाख ७३ हजार ६ सय ६६ रुपैया खर्च हुने महासचिव युवराज पराजुलीले बताए । तिलोत्तमा नगरपालिका वडा नं. ३ का वडासदस्य तेज बहादुर गुरुङले प्रतियोगिताको टाईसिट सार्वजनिक गरेका थिए ।