एजेन्सी – अर्जेन्टिनाका प्रशिक्षक लिओनेल स्कालोनीले कप्तान लिओनेल मेस्सीले अर्जेन्टिनाका लागि पछिल्लो समय मैदानमा अपेक्षित प्रदर्शन गर्न नसकेपनि टोलीको लागि निकै महत्त्वपूर्ण भूमिका निर्वाह गरेको बताएका छन् ।
मेस्सीले कोपा अमेरिकाको ४ खेल खेल्दै पाराग्वेविरुद्ध पेनाल्टीमा गोल गर्नुबाहेक अन्य खेलमा गोल गर्न सकेका छैनन् । यसका बाबजुद अर्जेन्टिना समूह उपविजेता हुँदै क्वाटरफाइनलमा जित दर्ता गरेर अन्तिम ४ मा प्रवेश गरेको छ । कप्तान मेस्सीको चौतर्फी आलोचना भइरहँदा प्रशिक्षक स्कालोनीले भने मेस्सीले टोलीमा महत्त्वपूर्ण भूमिका निर्वाह गरेको बताएका हुन् ।
‘ मलाई लाग्छ, मसंगै अन्य थुप्रैले पनि मेस्सीको महत्त्व बुझेका छन् । उनको मैदानभित्र मात्र होइन, ड्रेसिङ रुममा पनि उत्तिकै ठूलो भूमिका छ । मैले उनको टोलीमा कति ठूलो भूमिका छ भने चर्चा गर्नुपर्छ जस्तो लाग्दैन । मेस्सी भनेको मेस्सी नै हुन् । उनी विश्वकै सर्वोत्कृष्ट खेलाडी हुन्,’ स्कालोनीले भने ।
अर्जेन्टिनाले सेमिफाइनलमा आयोजक ब्राजिलको सामना गर्दैछ । यसका लागि प्रशिक्षक स्कालोनी तयार रहेको बताउँछन् । ‘यो खेल समग्र फुटबल समर्थकका लागि फरक अनुभव हुनेछ । हामी बेन्चमा रहेकालाई झनै फरक अनुभूति हुनेछ । तर खेल निकै रोमान्चक हुनेमा दुइमत छैन । हामी उनीहरुलाई केहि समस्यामा पारेर खेल जित्ने प्रयास गर्नेछौं,’ स्कालोनीले थपे ।
