एजेन्सी – फिफा विश्वकप २०२२ अन्तर्गत पहिलो चरणको छनोटअन्तर्गत दोस्रो लेग खेल्न उपस्थित नभएपछि विश्व फुटबलको सर्वोच्च निकाय फिफाले मकाउलाई कारवाही गरेको छ ।
घरेलु मैदानमा भएको पहिलो लेग १-० ले जितेपछि मकाउ दोस्रो लेग खेल्न श्रीलंका जान नमान्दा फिफाले मकाउलाई कारवाही गरेको हो । मकाउका राष्ट्रिय टोलीका खेलाडीले संयुक्त विज्ञप्ति जारि गर्दै सबै खेलाडी श्रीलंका जान तयार रहेको भनिरहँदा पनि मकाउ फुटबल संघले श्रीलंका जान नमानेपछि दोस्रो लेग स्थगित भएको थियो । मकाउले श्रीलंकामा सुरक्षा व्यवस्था फितलो भएको कारण देखाउँदै दोस्रो लेग अन्यत्र आयोजना गर्ने प्रस्ताव राखेको थियो ।
फिफाको अनुशासन समितिले मकाउले खेल्न नजाने निर्णय गरेकोलाई नियम उल्लंघन गरेको भन्दै दोस्रो लेगको खेल श्रीलंकालाई ३-० को जित सुम्पिएको हो । यससँगै श्रीलंका विश्वकप छनोटको दोस्रो चरणका लागि छनोट भएको हो । फिफाले मकाउलाई १० हजार स्विस फ्रान्क पनि जरिवाना गराएको छ ।
