काठमाडौं (हाम्रो खेलकुद)– नेपाल एपीएफ क्लबले ललित मेमोरियल यु १८ फुटबल च्याम्पियनसिपमा सोमबार रुस्लान थ्री स्टार क्लबलाई हराएको छ । सातदोबाटोस्थित एन्फा कम्प्लेक्सको खेल मैदानमा भएको खेलमा थ्री स्टार एपीएफसँग ५–२ को गोलअन्तरमा पराजित भएको हो ।

एपीएफको जितमा रन्जन पुनले २, विपिन थापामगर, रोहन प्रधान र समिराज थोकरले समान गोल गरे । थ्री स्टारका दिप्सन राउत र सुमन श्रेष्ठले गोल गरे ।

खेलको २१औं मिनेटमा विपिनको गोलबाट एपीएफले अग्रता लियो । २४औं मिनेटमा रन्जनले गोल गर्दै एपीएफको अग्रता दोब्बर पारे । ३३औं मिनेटमा रोहनले गोल गरेपछि पहिलो हाफमै थ्री स्टार ३–० ले पछि परेको थियो ।

४४औं मिनेटमा कप्तान दिप्सनले गोल गर्दै थ्री स्टारलाई खेलमा फर्काउने संकेत दिएका थिए । ४८औं मिनेटमा सुमनले गोल गरेपछि थ्री स्टारले खेललाई ३–२ को अवस्थामा ल्याएको थियो । ७३औं मिनेटमा रन्जन पुनले गोल गरेपछि एपीएफ खेलमा ४–२ ले अघि बढ्यो । ८६औं मिनेटमा समिराजले गोल गरेपछि एपिएफको जित सहज बन्यो ।

अर्को खेलमा एनआरटी र सिएमजी क्लब संकटाले १–१ को बराबरी खेलेका छन् । एनआरटीले अग्रतालाई एक मिनेट पनि जोगाउन नसक्दा बराबरीमा चित्त बुझाउनु परेको थियो । विवेक राईको गोलमा एनआरटीले ७५ औं मिनेटमा अग्रता लियो । तर संकटाले ७६ औं मिनेटमा अभि पहरीले गोल गर्दै खेललाई बराबरीमा पुर्याए । त्यसपछि थप गोल निस्कन नसक्दा खेल बराबरीमा सकियो । प्रतियोगितामा मंगलबार मनाङ र आर्मीबीच खेल हुनेछ ।