काठमाडौं(हाम्रो खेलकुद) – सिद्धार्थ वनस्थली इन्स्टिच्युट (एसभिआई) ले क्विक्स कप अन्तर विद्यालय राष्ट्रिय छात्र फुटबल प्रतियोगिताको पहिलो खेलमा फराकिलो जित निकालेको छ ।

मध्यपुर थिमीमा सोमबार भएको खेलमा एसभिआइले खोप्रिङ इंग्लिस सेकेन्डरी स्कुललाई १७–० को फराकिलो गोल अन्तरल पराजित गर्दै विजयी शुरुवात गरेको हो । वनस्थलीको फराकिलो जितमा समिर थापा मगरले ह्याट्रिकसहित ५ गोल तथा रियाम जंग शाहले ह्याट्रिकसहित ४ गोल गरे ।

आजद पुन मगर, अन्जान मगर र प्रतिक यादवले समान २ गोल गरे । विपीन भुजेल र कृष्ण थापा मगरले समान १ गोल गरे । गोलको वर्षा भएको खेलमा वनस्थलीले पहिलो हाफमै १०–० को फराकिलो अग्रता बनाउदा दोस्रो हाफमा ७ गोल गर्न सफल भएको थियो ।

सोमबारको अर्काे खेलमा नेपाल राष्ट्रिय माध्यमिक विद्यालयले पिनाकल स्कलर्स एकेडेमीमाथि ७–० को फराकिलो जित निकाल्यो । नेपाल राष्ट्रियको फराकिलो जितमा सागर तामाङले ह्याट्रिकसहित ४ गोल गरे । लाक्पो तामाङ बलले २ तथा सरोज लामाले एक गोल गरे । अर्काे खेलमा नेपाल एपीएफ स्कुलले श्रमिक शान्ति स्कुलमाथि ३–० को सहज जित निकाल्न सफल भयो । एपीएफको जितमा पवन शर्माले २ तथा अरुण ठकुरीले एक गोल गरे ।

प्रतियोगितामा मंगलबार समूह ‘क’ मा चार खेल हुनेछ । पहिलो खेलमा सैनिक आवासिय मावि र सनसाइन नेशनल स्कुल, जलपा मावि र मंगलदिप, एभरेस्ट आवासया मावि र ग्रीनफिल्ड तथा मदन स्मारक र लिभरपुलबीच खेल हुनेछ । सबै खेल मध्यपुर थिमीमा हुनेछ ।

नेपाल सरकार युवा तथा खेलकुद मन्त्रालयको वार्षिक कार्यक्रम अनुसार राष्ट्रिय खेलकुद परिषदको समन्वयमा क्वीक्सको मुख्य प्रायोजनमा अखिल नेपाल फुटबल संघले प्रतियोगिताको आयोजना गरेको हो । प्रतियोगितामा ६८ विद्यालयले सहभागिता जनाएका छन् ।