एजेन्सी – ब्राजिलियन फरवार्ड ग्याब्रीएल जेससले कोपा अमेरिका २०१९ को फाइनलमा गरेको व्यवहारलाई लिएर समर्थकसँग माफी मागेका छन् ।

पेरुविरुद्ध ३-१ को जितमा पहिलो हाफमा १ गोल र १ असिस्ट गरेका जेससले दोस्रो हाफमा दोहोरो पहेंलो कार्ड खाँदै मैदानबाट बाहिरिएका थिए । बाहिरिने क्रममा उनले रेफ्रीप्रति आक्रोश व्यक्त गर्दै निराशा जनाएका थिए । मैदानबाट बाहिर जाने बितिक्कै उनले बोत्तललाई लात्ताले हानेका थिए । त्यसपछि उनले भिडियो असिस्टेन्ट रेफ्री (भीएआर) को बुथलाई धकेल्दै बाहिर गएका थिए । उनी टनेलमा आँशु झार्दै रोइरहेको अवस्थामा देखिएका थिए ।

खेल सकिएपछि बोल्दै जेससले आफ्नो व्यवहारप्रति माफी मागेका छन् । ‘ म सबैजना सँग मेरो व्यवहारको लागि माफी माग्न चाहन्छु । रिसको झोकमा मैले गल्ति गरें । मेरो विचारमा त्यो रातो कार्ड सहि थिएन र मैले खराब व्यवहार गरें,’ उनले भने ।

‘ मेरो रिस यति उग्र थियो कि कसैलाई चोट पनि पुर्याउन सक्थें, धन्न केहि भएन । मेरो एकमात्र लक्ष्य टोलीलाई सहयोग पुर्याउने थियो र आक्रोशमा गल्ति हुन पुग्यो । हामी राम्रो खेलेर खेलमा अगाडि थियौं र रेफ्रीले गलत निर्णय गरें । मैले पनि आफूलाई काबुमा राख्न सकिन,’ जेससले थपे ।

‘मेरो आलोचनालाई मैले स्वीकारेको छु । म आफ्नो खेलको स्तरबारे जानकार छु र त्यसले नै मलाई यहाँसम्म ल्याएको हो । कहिले आलोचना त कहिले प्रशंसा खेलको पाटो हो,’ फाइनलमा नायक बनेका उनले भने, ‘ हामीले पहिलो दिनदेखि नै उपाधि लक्ष्यसहित मिहिनेत गरेका थियौं र आज सफल भयौं ।’

यो पनि : ब्राजिललाई कोपा अमेरिका उपाधि

यो पनि : व्यक्तिगत अवार्डमा ब्राजिलको वर्चस्व