एजेन्सी– बार्सिलोना तथा अर्जेन्टिनाका सुपरस्टार लियोनल मेस्सीलाई फुटबल इतिहासकै महान खेलाडी मध्ये एक मानिन्छ । ३१ वर्षे सुपरस्टारले खेल जीवनमा प्राप्त गरेका सफलता पनि लोभ लाग्दैछन् । पाँच पटक त उनले फुटबलमा सबै भन्दा ठूलो व्यक्तिगत पुरस्कार मानिएको बालोन डी ओर जितिसकेका छन् ।

मेस्सी अर्जेन्टिनाका लागि सर्वाधिक गोल गर्ने खेलाडी पनि हुन् । उनले देशका लागि १ सय ३४ खेल खेल्दै ६८ गोल गरिसकेका छन् । तर, यति सफल आँकडाका बीच देशका लागि खेलिएका महत्त्वपूर्ण प्रतियोगिताको नकआउटमा पुग्दा भने मेस्सी कमजोर देखिएका छन् ।

अर्जेन्टिनाका लागि मेस्सीले खेलेका नकआउटका पछिल्ला २० खेलमा ४ गोल मात्र गर्न सकेका छन् । कोपा अमेरिकाको सन् २००७ र २०१६ को संस्करणमा उनले समान २ गोल गरेका थिए । बार्सिलोनाबाट खेल्दा भने उनको आँकडा अविश्वसनिय छ । उनले बार्सिलोनाबाट १० पटक ला लिगा उपाधि, छ पटक कोपा डेल रे तथा ४ पटक च्याम्पियन्स लिग उपाधि जितेका छन् ।

तर, देशका लागि खेलिएका अन्तर्राष्ट्रिय प्रतियोगितामा भने उनको अवस्था सन्तोषजनक छैन । उनले अहिले सम्म अर्जेन्टिनाका लागि उपाधि दिलाउन सकेका छैनन् । २०१४ को विश्व कप फाइनल खेलेको अर्जेन्टिनाले लगातार दुई पटक कोपा अमेरिका फाइनलमा पनि पराजय भोगेको थियो । उनले अन्तर्राष्ट्रिय मन्चमा भने आफुलाई प्रमाणित गर्न अझै बाँकी छ ।