एजेन्सी –विश्वकप फुटबलको फाइनलमा फ्रान्सका जिनेदिन जिदानले इटालीका मार्को माटेराजीलाई टाउकोले हानेर ढालेको अर्थात हेडबट गरेको जुलाई ९ मा  १३ वर्ष पुरा भएको छ । त्यति बेला जिदानले माटेराजीलाई किन हाने भन्ने विषयमा थुप्रै हल्ला चले । अहिले आएर माटेराजीले जिदानलाई आफुले के भनेको भन्ने सार्वजनिक गरेका छन् ।

सन् २००६ को फइनलमा जिदानले पेनाल्टी गोलमार्फत फ्रान्सलाई खेलमा अग्रता दिलाएका थिए । पछि माटराजीले बराबरी गोल फर्काएका थिए । अन्तमा पेनाल्टीमा इटाली विश्व च्याम्पियन बनेका थिए । त्यसअघि थप समयका जिदानले रातो कार्ड खाएका थिए ।

हेडबटका रुपमा चर्चित त्यो घटनामा माटेराजीले जिदानलाई उक्साएको भन्ने पनि धेरै भए । त्यो घटनामा माटेराजीले रियल म्याड्रिडका वर्तमान प्रशिक्षक जिदानका आमाका विषयमा टिप्पणी गरेको हल्ला चलेको थियो । अहिले आएर माटेराजीले त्यो घटनालाई सार्वजनिक गरेका छन् ।

‘म त्यो घटनाका विषयमा किताब निकाल्ने निर्णयमा पुगेको छु । किनकी हरेकले मलाई त्यति बेला मैले के भनेका कारण जिदान त्यसरी आक्रमक भए भनेर सोधेका छन्,’ पूर्व रक्षकले भने,’ मेरो शब्द एकदमै खराब थिए । तर, जिदानबाट त्यस्तो प्रतिक्रिया अपेक्षा थिएन । मैले पछि धेरै कुरा सुने । मैले उनको आमाको होइन बहिनीका बारेमा भनेको थिए । म युवा अवस्था हुँदा मेरी आमाको निधन भएको थियो । त्यसैले म कसैलाई त्यसरी अपमान गर्न सक्दिन । ‘