काठमाडौं (हाम्रो खेलकुद) – नेपाली राष्ट्रिय फुटबल टोलीका मुख्य प्रशिक्षक योहान कालिनले विश्वकप छनोटमा अष्ट्रेलियासँग खेल्न पाउनु नेपाली खेलाडीको लागि राम्रो अवसर रहेको बताएका छन् ।

बुधबार मलेसियास्थित एएफसी मुख्यालयमा भएको विश्वकप छनोटको दोस्रो चरण अनतर्गत समूह चरणको ड्रमा नेपाल समूह ‘बी’ मा अष्ट्रेलिया, जोर्डन, चाइनिज ताइपेइ र कुवेत सम्मिलित समूहमा परेको हो । नेपालले छनोट अन्तर्गत सबै टोलीसँग घरेलु मैदान र अवे मैदानमा १-१ खेल खेल्नेछ ।

नेपाली टोलीका स्विडिस प्रशिक्षक कालिनले नेपाली खेलाडीको लागि युरोपेली लिग खेल्ने खेलाडीले भरिपूर्ण अष्ट्रेलियासँग खेल्न पाउनु ठूलो अवसर रहेको बताए । ‘ युरोपेली लिगमा खेल्ने खेलाडीले भरिपूर्ण अष्ट्रेलियासँग खेल्नु हाम्रो खेलाडीहरुको लागि अवसर हो । यो खेल निकै कठिन हुनेछ तर यसले हामीलाई नयाँ चुनौती पनि दिएको छ । स्तरीय टोलीविरुद्ध खेल्दा झनै उत्साहित हुनुपर्छ,’ उनले भने ।

कालिनले समूहमा अष्ट्रेलियामात्र नभएर अन्य टोली पनि बलियो रहेको स्वीकारे । ‘ ड्र मा सम्मिलित सबै टोली बलिया नै थिए । हाम्रो समूहमा जो परेपनि हामीले कठिन प्रतिद्वन्द्वी नै पाउने हो । हामी वार्त्माना स्थितिमा भन्नुपर्दा समूहको ‘अन्डरडग’ टोली हौं । हामीले छनोट हुने र नहुने भन्दापनि आफ्नो प्रदर्शन कसरि सुधार्ने भन्ने पक्षमा ध्यान दिनुपर्छ । हाम्रो प्रदर्शन राम्रो हुन्छ भने यसले राम्रो स्थानमा पुर्याउने नै छ,’ कालिनले थपे ।

नेपालले कालिनले टोलीको नेतृत्व सम्हालेपछि कुवेतविरुद्ध दुई र ताइपेइविरुद्ध एक पटक मैत्रीपूर्ण खेल खेलिसकेको छ । यसलाई भने कालिनले दुवै पक्षमा हेरेका छन् । ‘ हामीले समूहका दुवै प्रतिद्वन्द्वीसंग खेल्नुले फाइदा र बेफाइदा दुवै रहेको छ । फाइदा यो हिसाबमा कि हामीले राम्रो प्रदर्शन गरेमा उनीहरुलाई रोक्न सक्छौं । बेफाइदा यसकारण कि उनीहरुले हाम्रो खेल्ने शैली र खेलाडीलाई बुझेका छन्,’ कालिनले प्रष्ट पारे ।

घरेलु मैदानमा दर्शकको समर्थनले पनि नेपालको छनोट यात्रामा ठूलो भूमिका खेल्ने प्रशिक्षक कालिनले बताएका छन् । ‘ यो जस्तो छनोट प्रतियोगितामा घरेलु मैदानको फाइदाले निकै महत्त्व बोकेको हुन्छ । घरेलु समर्थकको अगाडि खेल्नु र अवे मैदानमा खेल्नुले निकै फरक पार्छ । मलाई आशा छ की हाम्रो मैदान समयमा नै तयार हुन्छ । यसले हाम्रो छनोट यात्रामा पक्कै सहयोग पुर्याउँछ,’ गत मार्चदेखि टोली सम्हालेका कालिनले थपे ।

कालिनले टोलीको तयारीबारे बोल्दै अहिलेको छनोट चरणको ड्रले खासै फरक नपार्ने बताए । ‘ हामीले अहिले जस्तो तयारी गरिरहेका छौं त्यसैलाई आउने दिनमा पनि निरन्तरता दिनेछौं । हामी दिर्घकालिन योजना बोकेर अगाडी बढिरहेका छौं । अहिलेको छनोट ड्रले हाम्रो योजनालाई अर्को मोड दिन जरुरि छैन,’ उनले टुंग्याए ।

नेपाली टोली पछिल्लो दुई सातादेखि विश्वकप छनोटको तयारीमा जुटेको छ । नेपालले विश्वकप छनोटका खेलअघि मैत्रीपूर्ण खेलहरु खेल्ने सम्भावना पनि रहेको छ । दक्षिण एसियाली खेलकुद डिसेम्बरमा आयोजना हुने भएपनि टोलीको तयारीमा कुनै असर नपर्ने कालिनले बताएका छन् ।

यो पनि : विश्वकप छनोट– नेपालको पहिलो खेल कुवेतसँग

यो पनि : विश्वकप छनोट : नेपाल र अष्ट्रेलिया एकै समूहमा