काठमाडौं (हाम्रो खेलकुद) – भक्तपुर जिल्लाका विभिन्न ९ फुटबल क्लबले भक्तपुर जिल्ला फुटबल संघले अनियमितता र जिल्लाका सक्रिय क्लबहरुलाई निरुत्साहित बनाएको आरोप लगाएको छ ।

• 

भक्तपुरका ९ फुटबल क्लबले बिहीबार संयुक्त रुपमा पत्रकार सम्मेलनको आयोजना गर्दै संघले सक्रिय क्लबहरुलाई वेवास्ता गर्दै जिल्ला फुटबल लिगका लागि जिल्ला प्रशासन र जिल्ला खेलकुद बिकास समितिमा दर्ता नै नभएको क्लबलाई जिल्ला लिग खेलाउन लागेको आरोप लगाएको छ ।

भक्तपुर फुटबल क्लबका अध्यक्ष राम प्रजापतिले जिल्लामा फुटबल लिग सञ्चालन हुन लागेपछि सक्रिय क्लबहरुले पनि लिगका लागि नाम दर्ता गराएको र पछि कारवाही गरिएको भन्ने खवर आएकाले नखेलाउने निर्णय भएको भन्दै आलटाल गर्ने काम भएको बताए ।

एन्फाको वार्षिक तालिका अनुसार भक्तपुरमा जेठ १५ बाट असार १५ सम्म र पछिललो पटक २ साउनसम्म जिल्ला लिग हुने तालिका थियो । तर, भक्तपुरमा अहिलेसम्म जिल्ला लिग हुन सकेको छैन ।

उनले यस विषयमा एन्फाबाट जिल्ला पठाइएका सन्जीव मिश्र र सह महासचिव अरुणमान जोशीसँग कुरा गर्द सबै विषयको टुङ्गो लागेको बताएपनि त्यो अहिलेसम्म पुरा हुन नसकेको बताए ।

अब पनि यस विषयले पुर्णता नपाए केही दिनमै अदालत जाने भक्तपुर फुटबल क्लबका अध्यक्ष राम प्रजापतिले बताए ।
यसै विषयमा जिल्लाका उपाध्यक्ष सुनिल प्रजापतिले फोनमार्फत क्लबहरुलाई कारवाही गरिएको र कहिले र कुन मितिमा कारवाही गरिएको भनी पत्र माग्दा अश्लिल शब्दहरुले गाली गरेको आरोप लगाए ।

त्यसपछि संघले नयाँ खेल तालिका सार्वजनिक गर्ने भएपछि हामी पुनः दर्ता शुल्क बापतको रकम लिएर जादा लिन नमानेको र पछि दर्ता नै नरहेको क्लबलाई समेट्दै खेल तालिका सार्वजनिक गर्ने घृणित कार्य गरेको अध्यक्ष प्रजापतिले बताए । जिल्ला लिगका लागि सहभागी १० मध्ये ६ क्लब प्रशासन र जिल्लामा दर्ता नरहेको उनले थपे ।

पछि अखिल नेपाल फुटबल संघमै गएर यस विषयमा जानकारी गराएर जिल्ला लिगमा सहभागगिताको लागि माग गरेको पनि केन्द्रबाट पनि कुनै सुनुवाई नभएपछि पत्रकार सम्मेलन गर्नुपरेको जानकारी दिए ।

जिल्ला फुटबल संघले अन्याय र भक्तपुर जिल्ला फुटबल संघमा अनियमितता, हालको जिल्ला फुटबल संघ नियम संगत नभएको र एन्फामा पनि यस विषयमा जानकारी गराउदा कुनै सुनुवाई नभएकाले केही दिनमै अदालत जाने तयारीमा रहेको बताए ।

उनले देशभर जिल्ला लिग सम्पन्न भइसक्दा भक्तपुरमा २६ असारबाट हुने भनिएको लिग आजसम्म पनि शुरु हुन नसकेको र तत्काल सक्रिय क्लबहरुलाई समावेश गराई जिल्ला लिग गराउन ८ क्लबहरुले संयुक्त रुपमा आग्रह गरेको छ ।