मिलान (एजेन्सी) – स्पेनको रियल मड्रिडले ११ औं पटक युरोपियन च्याम्पियन्स लिग फुटबलको उपाधि जितेको छ । सहरी प्रतिद्वन्द्वि एट्लेटिको मड्रिडलाई टाइब्रेकरमा ५–३ हराउँदै रियालले उपाधि जितेको थियो । रियलका लागि लुकास भाजक्वेज, मार्सेलो, गेराथ बेल,सर्जियो रामोस र क्रिस्टियानो रोनाल्डो गोल गरेका थिए । एट्लेटिकोका एन्टोनी ग्रेजमन, गावि र साउन निगुजले गोल गरे भने युवानफ्रानको प्रहार पोलमा लागेर फर्कियो ।

निर्धारित ९० मिनेट १–१ पछि थप ३० मिनेटमा कुनै निर्णय नभएपछि खेल पेनाल्टी सुटआउटमा भएको थियो । कप्तान सर्जियो रामोसले नजिकबाट गोल गर्दै रियललाई अग्रता दिलाएका थिए । १५ औं मिनेटमा टोली क्रुसको फ्रिकिकलाई गेराथ बेलले फ्लिक हेड गरेपछि नजिकबाट रामोसले गोल गरेका हुन् ।
रामोस तीनै खेलाडी हुन्, जसले दुई बर्षअघि सोही टोलीविरुद्ध इन्जुरी समयमा गोल गर्दै खेललाई थप समयतर्फ धकलेका थिए । जहाँ रियल ४–१ ले विजयी हुँदै १० औं पटक च्याम्पियन्स लिग उपाधि जित्न सफल भएको थियो । तर, आइबार बिहान खेल सकिन १२ मिनेट बाँकी रहँदा याननिक कारस्कोले बराबरी गोल फर्काएपछि च्याम्पियन्स लिग फाइनल थप समय तिर गएको छ । त्यसअघि दोस्रोे हाफ सुरु भएको पहिलो मिनेटमा एट्लेटिकोले बराबरीको मौका पाएको थियो । तर, एन्टेनो ग्रिजमन पेनाल्टीमा गोल गर्न चुके । उनको प्रहार क्रसबारमा लागेर फर्केको यिथो । पेनाल्टी बक्समा पेपले फर्नान्डो टोरेसलाई फाउल हानेपछि एट्लेटिकोले पेनाल्टी पाएको थियो ।
रियलका स्टार क्रिस्टियानो रोनाल्डोले अपेक्षा अनुसारको प्रदर्शन गर्न नसेपनि पेनाल्टीमा अन्तिम गोल गर्दै टोलीलाई जित दिलाउन सफल भए । म्यानचेस्टर युनाइटेडबाट एकपटक च्याम्पियन्स लिग जितेका रोनाल्डोले रियलमा दुईपटक जितेका छन् । जारी सिजनको फाइनलअघि उनले च्याम्पियन्स लिगमा रोनाल्डोले १६ गोल गरेका थिए । रियलको प्रशिक्षकका रुपमा जिनेदिन जिदानको त्यो पहिलो उपाधि हो । खेलाडीका रुपमा उनले २००२ को फाइनलमा निर्णायक गोल गर्दै रियललाई च्याम्पियन्स लिग जिताएका थिए ।