एजेन्सी – इटालियन क्लब युभेन्टसमा सिमित मौका पाइरहेका स्टार फरवार्ड पाउलो डिबालालाई इंगलिस क्लब टोटेनहम हट्स्परले अनुबन्धन गर्ने प्रयास गरेको छ ।

पछिल्लो दुई सिजन कुनै खेलाडी नभित्र्याएको स्पर्सले यस सिजन भने ट्रान्सफर बजारमा आक्रामक सुरुवात गरिसकेको छ । फ्रान्सेली मिडफिल्डर तान्गुई एनडोम्बेलेलाई क्लबको इतिहासमा नै सर्वाधिक ५५ मिलियन पाउण्ड खर्चेको स्पर्सले अब आफ्नो ध्यान डिबालातर्फ मोडेको छ । यसअघि क्लबले अर्जेन्टिनी मिडफिल्डर जिओभानी लो सेल्सोलाई भित्र्याउन खोजेपनि क्रिस्टियन एरिक्सनले क्लब नछाड्ने भएपछि क्लब पछाडी हटेको हो ।

डिबालाले युभेन्ट्समा क्रिस्टियानो रोनाल्डो आएपछि पहिलो रोजाइमा बिरलै अवसर पाएका छन् । नवनियुक्त प्रशिक्षक माउरिजियो सार्रीले रोनाल्डो र हिगुआइनलाई आफ्नो रोजाइमा राखेपछि उनले झनै खेल्ने समय नपाउने भएका हुन् । स्पर्सले डिबालाका लागि ८० मिलियन पाउण्डको प्रस्ताव राख्ने तयारी गरिरहेको बुझिएको छ ।

पछिल्लो सिजन च्याम्पियन्स लिगको फाइनलमा पराजित स्पर्सले यस सिजन खेलाडी अनुबन्धनमा निकै आक्रामक रुपमा लागेको छ । क्लबले अझै केहि खेलाडी भित्र्याउने सम्भावना रहेको छ । प्रिमियर लिगको शीर्ष ४ मा लगातार पर्न सफल स्पर्सका प्रशिक्षक माउरिसियो पोचेटिनोले क्लब नछाड्ने बताएसँगै स्टार खेलाडीहरु पनि क्लब नछाड्ने पक्षमा रहेका छन् ।