एजेन्सी – म्यानचेस्टर युनाइटेडका महान प्याट्रिक इभ्राले अन्तर्राष्ट्रिय फुटबलबाट सन्यास लिएका छन् । फ्रान्सेली पूर्व अन्तर्राष्ट्रिय खेलाडी ३८ वर्षे इभ्राले २० वर्षे यात्रामा ८ क्लबबाट खेलेका थिए । इभ्राले अब आफुलाई प्रशिक्षणको यात्रामा लाने सोच बताएका छन् । उनका पूर्व युनाइटेडका प्रशिक्षक एलेक्स फगुर्नसनले उनी प्रशिक्षणमा जाने सक्ने अनुमान गरेका थिए ।

‘मेरो खेल जीवन औपचारिक रुपमा अन्त्य भएको छ । मैले युईएफएको बी कोचिङ लाइसेन्स सन् २०१३ बाट सुरु गरेको हो,’ इभ्राले भने,‘ अब म यो टुंगाएर ए साइसेन्सका लागि प्रयास गर्नेछु । आउने एक वा डेढ वर्षमा सबै सकिन्छ । त्यसपछि म टोलीको नेतृत्वका लागि तयार हुनेछु ।’

फर्गुसनले उनका दुई खेलाडी कसले भविष्यमा प्रशिक्षण गर्न सक्छन् भन्ने प्रश्नमा रायन गिग्स र इभ्राको नाम लिएका थिए । इभ्रा प्रिमियर लिगका उत्कृष्ट लेफ्ट ब्याकमध्येका एक मानिन्छन् । उनले युनाइटेडमा ८ वर्ष बिताएका थिए । उनले युनाइटेडका लागि ३ सय ७९ खेल खेलेका थिए ।

इटालियन क्लब मार्सालाबाट १९९८ मा खेल्न थालेका इभ्रा त्यसपछि मोन्जा गएका थिए । त्यहाँ ६ वर्ष बिताएपछि उनी नाइस र मोनाकोमा रहे । त्यसपछि उनको यात्रा युनाइटेडतर्फ मोडियो ।
युनाइटेडमा उनले १५ वटा उपाधि जिते । त्यसपछि उनी युभेन्ट्स र मार्सेली पुगे । उनले २०१७/ ०१८ को सिजन वेस्ट ह्याममा बिताए । पछिल्लो सिजनबाट क्लब पाउन छाडेपछि अन्ततः सोमबार उनले खेल जीवनबाट सन्यासको घोषणा गरेका छन् ।