काठमाडौं (हाम्रो खेलकुद)– नेपाली फुटबल टोलीका मिडफिल्डर रोहित चन्दको इन्डोनेसियन क्लब पर्सिजा फेरि बराबरीमा रोकिएको छ । दुई पटकको अग्रता जोगाउन नसक्दा रोहितको टोलीले शुक्रबार मादुरा युनाइटेडसँग २२ को बराबरी खेलेको थियो ।

साविक विजेता समेत रहेको पर्सिजाले एम सिमिकको गोलबाट १९ औं मिनेटमा अग्रता लिएको थियो । तर डी लालेले ४८ औं मिनेटमा मादुरका लागि बराबरी गोल फर्काए । ५० औं मिनेटमा एम सिमिकै गोलाबट पर्सिजाले दोस्रा पटक अग्रता लियो ।

ए फदिरले ७८ औं मिनेटमा गोल फर्काउँदै खेललाई पुनः बराबरीमा पुर्याएका थिए । रोहितले पुरा समय खेलेको खेलमा पर्सिजाले अर्को गोल थप्न सकेन र बराबरीमा चित्त बुझाउनु पर्यो । भदौ ९ गते मलेसियाको लिग च्याम्पियनविरुद्ध हुने मैत्रीपूर्ण खेलमा रोहित २३ सदस्यीय नेपाली टोलीमा रोहित परेका छैनन् । शुक्रबार नै एन्फाले मैत्रीपूर्ण खेलका लागि टोलीको नाम सार्वजनिक गरेको थियो ।

पर्सिजाले यो सिजन लगातार खराब प्रदर्शन गरिरहेको छ । जसका कारण टोली रेलिगेसन जोनमा छ । इन्डोनेसिया लिग १ मा १८ टोलीको सहभागिता रहेको प्रतियोगितामा पर्सिजा १७ औं स्थानमा छ ।

१० खेलको समाप्तीमा १ मात्र जित दर्ता गराएको पर्सिजाले ६ खेलमा बराबरी र ३ खेलमा हार बेहोरेको छ । १३ खेलमा मादुरा २३ अंकका साथ अंकतालिकाको तेस्रो स्थानमा छ । १३ खेलमा ३१ अंकका साथ बाली युनाइटेड शीर्षस्थानमा छ ।