एजेन्सी – लिभरपुलका प्रशिक्षक योर्गन क्लोपले क्लबका पूर्व मिडफिल्डर फिलिप्पे काउटिन्होलाई बार्सिलोनाबाट लिन चाहेपनि चर्को मुल्यका कारण सम्भावना नभएको बताएका छन् ।

काउटिन्हो यसै साता बार्सिलोनाबाट एक वर्षको लोनमा बायर्न म्युनिख पुगेका छन् । सिजनको अन्त्यपछि बायर्नले चाहेको खण्डमा १ सय २० मिलियन पाउन्डमा काउटिन्होलाई स्थायी रुपमा क्लबका राख्न सक्नेछ । काउटिन्होलाई लिने विषयमा चर्चा भएपनि आर्थिक कारणले गर्दा त्यो सुरुवा सम्भव नभएको क्लोपले बताएका छन् ।

‘सुन्दा सहज लाग्दैन । तर हामीले त्यति मुल्य तिर्न सक्ने अवस्थामा थिएनौं, ‘ उनले भने, ‘हामीले यो सिजनका लागि थ्रुपै खर्च गरिसकेको छौं । त्यसले उनलाई ल्याउन सहज भएन । उनी बायर्नमा जानु दुवै टोलीका लागि राम्रो सम्झौता हो । ‘

क्लोपले काउटिन्होको तारिफ पनि गरे । ‘उनी उत्कृष्ट खेलाडी र असल मान्छे हुन् ,’उनले थपे, ‘राम्रो वातावरण भएको अवस्थामा खेल कुनै पनि बेला परिवर्त गर्न सक्ने उनी विश्व स्तरीय खेलाडी हुन् ।’

२७ वर्षे काउटिन्हो सन् २०१७ मा लिभरपुलबाट बार्सिलोना पुगेका थिए । त्यहाँ उनले ७६ खेल खेल्दा २१ गोल गरेका थिए । उनी रहँदा टोलीले २ ला लिगा र एक पटक कोपा डेल रे जितेको थियो ।