एजेन्सी – स्पेनिस गोलरक्षक डेविड डे गेयाले इंग्लिस क्लब म्यानचेस्टर युनाइटेडमा सम्झौता नवीकरण गरेका छन् । युनाइटेडका पहिलो रोजाइका गोलरक्षक गेयाले युनाइटेडमा ४ वर्ष लामो सम्झौता नवीकरण गरेका हुन् ।
अब उनी २०२३ जुनसम्म युनाइटेडमा रहनेछन् । उनको क्लबमा एक सिजनमा करसँगै १३.३ मिलियन पाउन्ड वृद्धि हुनेछन् । जुन युनाइटेडमा गोलरक्षकको लागि खर्चिएको सबैभन्दा धेरै रकम हो । यससँगै डेविड युनाइटेडका सर्वाधिक महँगा तथा गोलरक्षकमा सबैभन्दा महँगा खेलाडी बनेका छन् ।
डेविडलाई अनुबन्ध गर्न स्पेनिस क्लब रियल म्याड्रिड, फ्रेन्च पेरिस सेन्ट जर्मेन (पीएसजी) र इटालियन क्लब युभेन्टसले पनि प्रयास गरेका थिए । तर, डेविडले युनाइटेडमै सम्झौता नवीकरण गरे ।
प्रशिक्षक ओले गनर सोल्सजरले डेभिडले क्लबमा सम्झौता नवीकरण गर्नेमा विश्वस्त रहेको र त्यो पुरा भएको बताएका छन् । सन् २०११ मा स्पेनिस क्लब एट्लेटिको मड्रिडबाट युनाइटेड आएका २८ वर्षे गोलरक्षक डे गेयाले युनाइटेडमा उच्च प्रदर्शन गर्दै ३६७ खेलमा १३० क्लिन सिट राखेका छन् । गेयाले युनाइटेडबाट १ प्रिमियर लिग, १ एफए कप, १ लिग कप र १ युरोपा लिग जितेका छन् ।
