काठमाडौं (हाम्रो खेलकुद) – नेपाली राष्ट्रिय फुटबल टोलीका महत्त्वपूर्ण सदस्य रोहित चन्दले गोल गरेपछि इन्डोनेसियाको शीर्ष डिभिजन लिगमा पर्सिजा जकार्ताले जित दर्ता गरेको छ ।

लिगमा तेस्रो जित दर्ता गर्ने क्रममा पर्सिजाले पीएसआईएस सेमाराङलाई २-१ ले पराजित गरेको हो । पहिलो हाफको इन्ज्युरी समयमा क्रोएसियाली फरवार्ड मारिओ सिमिचको गोलमा पर्सिजाले अग्रता लिएको थियो । उनले पेनाल्टीमा गोल गरेका थिए । दोस्रो हाफको ५३ औं मिनेटमा रोहितले गोल गर्दै पर्सिजाको अग्रता दोब्बर पारे ।

रोहितले कर्नरमा क्लियर हुन नसकेको बललाई ६ यार्ड बक्सबाट गोलमा परिणत गरेका थिए । सेमाराङका लागि सेप्सिएन मौलानाले ६३ औं मिनेटमा गोल फर्काएपनि पर्सिजाले खेलमा जित हात पारेको हो । डिफेन्डिङ च्याम्पियन रहेको पर्सिजाको जारि सिजन प्रदर्शन अपेक्षित हुन सकेको छैन । रोहित राष्ट्रिय टोलीमा रहँदा पर्सिजाले रोहितविना खेलेको दुवै खेलमा पराजय बेहोरेको थियो ।

यस जितसँगै पर्सिजा रेलिगेसन क्षेत्रबाट भने माथि उक्लिएको छ ।टोलीले १६ खेलमा ३ जित र ८ बराबरीका साथ १७ अंक जोडेको छ । जारि लिगमा रोहितको यो पहिलो गोल हो । यसअघि रोहित पर्सिजाको पछिल्लो जितमा म्यान अफ द म्याच घोषित भएका थिए ।

हेर्नुहोस रोहितको गोल :