काठमाडौं (हाम्रो खेलकुद) – यसै साता सुरु हुने साफ यू १८ च्याम्पियनसिप फुटबलका लागि सबै तयारी पुरा भएको अखिल नेपाल फुटबल संघ (एन्फा) ले मंगलबार पत्रकार सम्मेलनमार्फत जनाएको छ । दक्षिण एसियाका ६ राष्ट्रको सहभागिता रहने च्याम्पियनसिप असोज ३ देखि १२ गते सम्म हलचोकस्थित नेपाल एपिएफ रंगशालामा हुनेछ ।

समूह ‘ए’मा आयोजक नेपाल, भुटान र माल्दिभ्स छन् । त्यस्तै बंगलादेश, भारत र श्रीलंका समूह ‘बी’मा छन् । सहभागी टोली मध्ये माल्दिभ्स नेपाल आइसकेको छ भने रेफ्रि अफिसियलहरु बुधबार नेपाल आइपुग्ने एन्फाका कार्यवहाक महासचिव अरुणमान जोशीले जानकारी दिए ।

च्याम्पियनसिपको उद्घाटन खेल शुक्रबार नेपाल र माल्दिभ्सबीच हुनेछ । नेपाल च्याम्पियनसिपको साविक विजेता हो । राउन्ड रोविन लिगपछि समूहका शीर्ष दुई टोली सेमिफाइनल पुग्नेछन् । प्रतियोगिताका सबै खेल नेपाल टेलिभिजनको एनटिभि प्लसबाट प्रत्यक्ष प्रसारण हुने बताइएको छ ।

एन्फाले टिकको मुल्य ५ सय तोकेको छ । च्याम्पियनसिपमा सहभागि टोलीको अभ्यासका लागि लगनखेलको वुद्धि विकास खेल मैदान र नेपाली सेनाको जगदल गणको खेल मैदान छाउनीमा व्यवस्था ष्रिएको बताइएको छ । एन्फाका उपाध्यक्ष वीरबहादुर खड्काको संयोजकत्वमा मुल आयोजक समिति गठन गरिएको एन्फाले जनाएको छ । विभिन्न उप समिति समेत गठन गरिएको बताइएको छ ।

प्रतियोगिताका लागि झन्डै २ करोड खर्च हुने एन्फाको छ । जसका लागि दक्षिण एसियाली फुटबल संघ (साफ) ले १ लाख ६० हजार अमेरिकी डलर उपलब्ध गराउने बताइएको छ । नपुग रकम एन्फाले आफ्नै श्रोतबाट जुटाउने बताइएको छ । नेपाली टोलीका मुख्य प्रशिक्षक चेतनारायण श्रेष्ठले मंगलबार नै आफ्नो अन्तिम टोलीको नाम सार्वजनिक गरेका छन् ।