सिटीको सहज जित

एजेन्सी – इंग्लिस क्लब म्यानचेष्टर सिटीले च्याम्पियन्स लिग फुटबलमा सहज जित निकालेको छ । सिटीले युक्रेनी क्लब साख्त डोनेस्कमाथि उसकै मैदानमा ३–० को सहज जित निकालेको हो ।

युक्रेनमा बुधबार राति भएको खेलमा सिटीलाई सहज जित दिलाउन रियाद महारेज, इकेए गुन्डोगान र ग्याब्रियल जेससले गोल गरे ।
खेलको २४औं मिनेटमा सिटीले रियाद महारेजको गोलबाट अघि बढेको थियो । ३८औं मिनेटमा गुन्डोगोनले गोल गर्दै सिटीलाई पहिलो हाफमा २–० को अग्रता दिलाए ।

७६औं मिनेटमा ब्राजिली ग्याब्रियल जेससले गोल गर्दै सिटीलाई ३–० को जित सहज बनाए । सहज जितसँगै सिटीले समूह ‘सी’ मा ३ अंक जोडेको छ । साख्तर अंकविहीन छ ।

यही समूहको अर्काे खेलमा क्रोएसियाको डाइनामो जाग्रिवले इटालियन क्लब एटलान्टामाथि ४–० को शानदार जित निकालेको छ । जाग्रवको शानदार जितमा मिस्लभ ओरसिसले ह्याट्रिक पुरा गर्दा मारिन लियोभाक एक गोल थपे । जितसँगै जाग्रिव ३ अंक जोडेर शीर्षस्थानमा रहेको छ । एटलान्टा अंकविहीन हुदै पुछारमा छ ।