काठमाडौं (हाम्रो खेलकुद) – दक्षिण एसियाली फुटबल महासंघ (साफ) को कार्यक्रम अन्तर्गत साफ यू-१८ च्याम्पियनसिप शुक्रबारदेखि नेपालमा सुरु हुँदैछ । हालसम्म आयोजित दुवै संस्करणको विजेता नेपाल यसपटक घरेलु मैदानमा ह्याट्रिक गर्ने सुरमा छ । तर अघिल्लो संस्करणको विजेता टोलीले भने एन्फाले घोषणा गरेको पुरस्कार अहिलेसम्म पाएको छैन ।

गोलरक्षक अर्पण कार्कीको कप्तानीमा रहेको नेपालले भुटानमा भएको प्रतियोगितामा भारत र बंगलादेशलाई पछि पार्दै उपाधि जितेको थियो । राउन्ड रोबिन लिगमा भएको प्रतियोगितामा नेपाल भुटानसँग पहिलो खेलमा नै पराजित भएको थियो । त्यसपछि माल्दिभ्स, बंगलादेश र भारतलाई पराजित गर्दै नेपाल उपाधि जित्न सफल भएको थियो ।

एन्फाले त्यसबेला उपाधि जितेपछि टोलीका हरेक सदस्यलाई २ लाख रुपैयाँ प्रदान गर्ने निर्णय गरेको थियो । उक्त निर्णय एन्फाको पुरानो कार्यसमितिले गरेको भएपनि चुनावपछि कर्मा छिरिङ शेर्पाको नेतृत्वले पुरस्कार समयमा दिने बताएको थियो । प्रतियोगिता सकिएको दुई वर्ष र नयाँ कार्यसमिति आएको डेढ वर्ष बितिसक्दा पनि खेलाडीहरुले पुरस्कार पाएका छैनन् ।

गतवर्ष दशैं अघि नै एन्फाले पुरस्कार वितरण गर्ने भन्दै कार्यसमितिबाट निर्णय नै गरेको थियो । तर कार्यक्रम तय गर्ने तयारी थालिएको भनेपनि एक वर्षसम्म पनि उक्त कार्यक्रम आयोजना हुन सकेन । यस विषयमा एन्फाका महसचिव इन्द्रमान तुलाधरले छिट्टै उक्त पुरस्कार वितरण गर्ने बताए ।

‘हामीले धेरै आश्वासन पायौं । कहिले अर्को महिना त कहिले अबको बैठकमा पाइन्छ भनिन्छ । अब आशा गर्नुबाहेक केहि गर्न सकिन्न,’ टोलीका एक सदस्यले हाम्रोखेलकुदसँग भने । उक्त टोलीका अधिकांश सदस्य अहिले दक्षिण एसियाली खेलकुदको तयारीमा छन् । सुमन अर्याल र अभिषेक रिजाल भने राष्ट्रिय टोलीमा नै नियमित खेल्दै आइरहेका छन् । अन्य केहि खेलाडी पनि बन्द प्रशिक्षणमा रहने गरेका छन् ।

सन् २०१७ मा साफ यू-१८ जित्ने टोली :

गोलरक्षक: अर्पण कार्की (कप्तान), सन्देश गुरुङ, अभिषेक बराल

डिफेन्डर: विश्वास उदास, असिम भुषाल, विकास खवास, राजन गुरुङ, सुमन अर्याल, आकाश श्रेष्ठ, निराजन महर्जन, रोमन लिम्बु

मिडफिल्डर : अशोक थापा मगर, दिनेश हेन्जन, अभिषेक रिजाल, अनिल महर्जन, सेसेहाङ आङदेम्बे, एरिक विष्ट, राम वजी, राजीव लोप्चन

फरवार्ड: रेजिन सुब्बा, दिपेश आले मगर, प्रेजेन तामाङ, धिरज श्रेष्ठ