काठमाडौं (हाम्रो खेलकुद)- अखिल नेपाल फुटबल संघ (एन्फा) ले मोफसलको प्रतियोगिता सञ्चालनका लागि मिति सार्वजनिक गरेको छ । एन्फाले मोफसलको सबै तहमा आयोजना हुने लिगलाई व्यवस्थित गर्नको लागि २ असोजबाट ४ असारसम्मको मिति सार्वजनिक गरेको हो ।

 

जसमा २२ गोल्डकपसहित सहिद स्मारक ‘ए’ डिभिजन लिग, अन्तर प्रदेश एन्फा प्रेसिडेन्ट कप र राष्ट्रिय लिग आयोजना हुनेछ । एन्फाका अनुसार गोल्डकप आयोजकले एक हप्ता अघि नै प्रतियोगिताको खेल तालिका सार्वजनिक गर्नुपर्ने र प्रतियोगिताको बिमा गरिएको हुनुपर्ने नियम राखिएको छ । हरेक गोल्डकपको अवधि १० दिनलाई तोकिएको छ ।

जसअनुसार एन्फाले २ असोजबाट ११ असोजसम्म पहिलो मिति, असोज ९ देखि १८ सम्म दोस्रो मिति, २६ असोजदेखि कात्र्तिक ५ सम्म तेस्रो मिति, ३० असोजदेखि कात्र्तिक ९ सम्म चौथो मिति, कत्र्तिक १४–२३ पाँचौ मिति, कात्र्तिक २१–३० छैटौ मिति, कात्तिक २८ मंसिर ७ सातौ मिति, मंसिर ५–१४, आठौं मिति, १२–२१, नवौ मिति, १९–२९ दशौं मिति रहेको छ ।

मंसिर २८ बाट माघ २९ सम्म सहिद स्मारक ‘ए’ डिभिजन लिग र अन्तर प्रदेश एन्फा प्रेसिडेन्ट कप आयोजना हुनेछ । माघ २९ बाट फागुन ८ सम्म गोल्डकपको ११औं मिति, फागुन ६–१५ १२औं मिति, १३–२२ तेह्रौ मिति, २०–२९ चौधौं मिति, फागुन २७– चैत ६ पन्ध्रौ मिति, चैत ४–१७ सोह्रौ मिति, ११–२० सत्रौं मिति र चैत १८–२७ अठारौं मिति तोकिएको छ ।

चैत २५ देखि बैशाख २५ सम्म राष्ट्रिय लिगको मिति तोकिएको छ । राष्ट्रिय लिगमा सहिद स्मारक ए डिभिजन लिगका शीर्ष ६ क्लब र अन्तर प्रदेश एन्फा प्रेसिडेन्ट कप खेल्ने ४ क्लबले सहभागीता जनाउनेछन् । जेठ १ बाट १० सम्म उन्नाइसौं मिति, जेठ ८–१८ बीसौं मिति, जेठ १८–२८ एक्काइसौं मिति र जेठ २६ बाट असार ४ सम्म गोल्डकपको २२औं मिति तोकिएको छ ।