एजेन्सी – अर्जेन्टिनी तथा प्रिमियर लिग क्लब म्यानचेस्टर सिटीका फरवार्ड सर्जियो अगुइरोले म्यानचेस्टर डर्वीको प्रिमियर लिग खेल गुमााउने भएको छ । थाइ इन्ज्युरीका कारण अगुइरोले ७ डिसेम्वरमा हुने म्यानचेस्टर डर्वीको खेल गुमाउने पक्का भएको प्रशिक्षक पेप ग्वार्डिओलाले बताएका छन् ।
अगुइरोले चेल्सीविरुद्ध २–१ को जित निकालेको खेलमा चोट बोकेका थिए । उनी ७७औं मिनेटमा मैदान छाड्न बाध्य बनेका थिए । प्रशिक्षक ग्वार्डिओलाले अगुइरोले चोट बोक्नु क्लबका लागि दुखद् रहेको र के कति चोट हो भन्ने आउन बाँकी रहेको बताएका छन् । यस्तै प्रशिक्षक ग्वार्डिओलाले अगुइरोले च्याम्पियन्स लिग अन्तरगत शाख्तर डोनेस्कविरुद्धको खेल समेत गुमाउने बताएका छन् ।
सिटी र साख्तरबीचको खेल आज राति हुदैछ । ‘हो अगुइरोले चोट बोकेका छन् । उनको चोटको अवस्था के हो त्यो मलाई थाहा छैन । तर, उनले केही खेल गुमाउने पक्का छ ।’ ग्वार्डिओलाले भने । अगुइरोले यो सिजन प्रिमियर लिगमा ९ गोल गरेका छन् ।
अगुइरोको अनुपस्थितिमा सिटीको अग्रपङ्ति ब्राजिलियन फरवार्ड ग्याब्रियल जेससले सम्हाल्ने पक्का छ । उनले यो सिजन प्रिमियर लिगमा ५ गोल गरेका छन् ।
प्रिमियर लिगमा सिटी १३ खेलबाट २८ अंक जोडेर तेस्रो स्थानमा रहेको छ । अपराजित रहेको लिभरपुल ३७ अंकसहित शीर्षस्थानमा तथा लेस्टर सिटी २९ अंक जोडेर दोस्रो स्थानमा छ ।
