काठमाडौं (हाम्रो खेलकुद)– कारवाही घटाउन माग गर्दै अपिल गरेका राष्ट्रिय फुटबल टोलीका सदस्य विमल घर्ती मगरसहित ४ खेलाडीका विषयमा अखिल नेपाल फुटबल संघ (एन्फा) को अपिल कमिटीले आज निर्णय सुनाउने सम्भावना छ ।

अनुशासन उल्लघंन गरेको भन्दै एन्फाले मंसिर २७ गतेका दिनबाट लागु हुने गरि विमल, अन्जन विष्ट, दीनेश राजवंशी र सन्तोष तामाङलाई कारवाही गरेको थियो । विमल र दीनेशर्लाइ ९० दिन तथा अन्जन र सन्तोषलाई ४५ दिन निलम्बन गर्ने र सबैलाई ५० हजार रुपैयाँ जरिवाना तोकेको थियो ।

‘अपिल कमिटिको निर्णय आज आउँछ,’ एन्फा श्रोतले भन्यो, ‘चारै जनालाई आज बोलाउँछौं । कारवाही घटाउने सम्भावना कम छ । तर पुरानै मितिबाट लागु हुने गरि कारवाही कायम हुन सक्दछ ।’

आफूहरुले गल्ति गरेको र त्यसको सजाय पनि भोगेको उल्लेख गर्दै कारवाही घटाइ दिनका लागि अपिल कमिटी समक्ष मंसिर ३० गते चारै जनाले अलग अलग निवेदन दर्ता गराएका थिए । निलम्बनकै कारण विमल, अन्जन र दिनेश दुई साता अघि स्वदेश मै सम्पन्न १३ औं दक्षिण एसियाली खेलकुद (साग) यू २३ टोलीबाट हटाइएका थिए । कारवाही गर्नुपर्ने घटना भएको एक महिनापछि मात्र एन्फाले ४ खेलाडीमाथि निलम्बन गरेको थियो ।

४ खेलाडीले मंसिर ३ गते कुवेतसँगको विश्व कप छनोट खेल्नका लागि भुटान जानुअघि अघिल्लो राती डिस्को गएर मादक पदार्थ सेवन गरेको भन्दै समाचार सार्वजनिक भएपछि एन्फाले कारवाही गरेको थियो । भुटान जानका लागि कात्तिक ३० गते एन्फा पुगेपनि कारवाही सुनेपछि ४ जना घर फर्केका थिए ।

कात्तिक ३० गते देखि कारवाही लागु भएमा सिग्नेचर मनाङ मस्र्याङ्दी क्लबका अन्जन र आर्मीका सन्तोषलेले कतार एयरवेज सहिद स्मारक एक डिभजिन लिगमा अबका दुई खेल मात्र गुमाउनेछन् । एन्फाको कारवाहीमा यथावत रहेमा अन्जन र सन्तोषले लिगको सुरुवाती डेढ महिनाको खेल गुमाउनेछन् । अन्जन साविक विजेता मनाङ मुख्य खेलाडी हुन् । उनि विना मनाङले खेलेका दुवै खेल जित्दै शीर्षस्थानमा रहेको छ । त्यस्तै सन्तोषले आर्मीको मिडफिल्ड सम्हाल्दै आएका छन् ।

कात्तिक ३० देखि कारवाही लागु भएमा दीनेशले भने अझै डेढ महिना लिगको खेलमा गुमाउनेछन् । उनी यहि सिजन रुस्लान थ्री स्टार क्लब छोडेर च्यासल युथ क्लबसँग आबद्ध भएका थिए । उनले गत महिना सम्पन्न चन्द्रागिरी गोल्डकप पनि खेलेका थिए । विमलको हकमा भने उनी माल्दिभ्सको लिग खेलिरहेका कारण एन्फा अन्तर्गत प्रतियोगितामा मात्र कारवाही हुनेछ । यसबीचमा राष्ट्रिय टोली अथवा अन्य कुनै प्रतियोगिता भएको खण्डमा विमल सहभागी हुने छैनन् । विमलले पछिल्लो समय माल्दिभ्सको शीर्ष डिभिजनको क्लब टीसी स्पोर्ट्सबाट खेल्दै आएका छन् ।

एन्फा एकेडेमीका उत्पादन विमल, अन्जन र दीनेश एकै ब्याचका खेलाडी हुन् । उनीहरुले यू १६, १९ देखि नै सँगै खेल्दै आएका छन् । यी तीनको निवेदनको बेहोरा लगभग उहि रहेको बताइएको छ । आफुहरुबाट गल्ति भएको, आइन्दा यस्तो गल्ति नदोहोरिने र कारवाही घटाइदिन भन्दै उनीहरुले अलग अलग निवेदन अपिल कमिटिलाई बुझाएका थिए । सन्तोष पछिल्लो वर्षबाट राष्ट्रिय टोलीमा पर्दै आएका छन् ।